Furtuna te opozita e re/ Korab Lita pasi zuri vendin e Rudina Hajdarit: Shpërdoroi besimin e grupit

Korab Lita, i zgjedhur në krye të grupit demokrat në Kuvend, ka shpjeguar përmes një konference për shtyp atë që ka ndodhur, pas shkarkimit të Rudina Hajdarit nga ky post.

Lita tha se Hajdai shpërdoroi besimin e grupit.

“Është diskutuar për funksionimin e grupit parlamentar ku pasi janë bërë prezentë nga të gjithë anëtarët e grupit të gjitha problematikat e hapura deri tani, i është kërkuar zonjës Hajdari të tërhiqet nga drejtimi i grupit dhe të vazhdojë me detyrat e tjera mjaft të rëndësishme që ka në mbështetje të grupit. Pas bërjes prezent të shpërdorimit të besimit tonë prej 6 muajsh si në aspektin organizativ, politik dhe deri në atë ligjor, zonja Hajdari në mënyrë verbale deklaroi dorëheqjen e saj në mënyrë verbale përballë grupit. Pas këtij momenti grupi kaloi në procesin zgjedhor të zgjedhjes së kryetarit të tij. Për këtë arsye u propozuan tre kandidatura z.Alban Zeneli, z.Halit Valteri dhe Korab Lita. Z.Alban Zeneli u tërhoq nga gara dhe në garë ngelën dy kandidatura. Halit Valteri dhe Korab Lita. Zoti Valteri kërkoi kohë për të takuar kolegët me qëllim lobimin për vota nga kolegët për këtë detyrë. Me unanimitet grupi vendosi që t’i jepet kohë zoti Valteri deri ditën e nesërme datë 11 tetor 2019. Në këtë mbledhje pasi kishte bërë lobim dhe nuk gjeti mbështetje nga kolegët për këtë detyrë, zoti Valteri deklaroi se tërhiqet dhe më mbështet mua në këtë garë. Për këtë u votua në mënyrë të hapur dhe u përpilua procesverbali i mbledhjes dhe u vendos nga të gjithë të pranishmit në mbledhje, në mënyrë unanime. Pas këtij momenti në respekt të rregullores së Kuvendit, neni 16, pika 2 është bërë procedura për të njoftuar kryetarin e Kuvendit për ndryshimet e bëra. Kjo procedurë është firmosur nga 7 anëtarët e grupit, përfshirë edhe zotin Valteri, procedurë e cila u dërgua në protokollin e Kuvendit të Republikës së Shqipërisë. Kjo është e gjitha ajo çka ka ndodhur, në respekt të informimit të opinionit publik”, deklaroi Korab Lita, në një konferencë për mediat nga Kryesia e Kuvendit.

LEXO EDHE  Meta thirrje qytetarëve: Merrni në dorë fatet, mbroni Republikën. Referendum për të mbrojtur të ardhmen

I pyetur nëse opozita e re rrezikon shkrirjen, Lita u shpreh: “Opozita nuk rrezikon shkrirjen”.

Grupi Parlamentar Demokrat po kalon momente të vështira pasi anëtarët janë përçarë dhe një pjesë e tyre kanë larguar Rudina Hajdarin nga drejtimi dhe kanë vendosur Korab Litën.