I riu për të cilin policia njoftoi paraditen e sotme ndalimin për veprën pedale “Përdorimi me keqdashje i thirrjeve telefonike”, ka reaguar përmes një status në Facebook.
Ai mohon akuzat e ngritura nga vajza se e ka ngacmuar përmes telefonit.
“Nuk jam arrestuar. U shoqerova ne polici per te sqaruar detajet e ketij lajmi qe nuk e di nga mbiu, por fatkeqesishte beri hatane. U ndjeva tmerresishte keq kur koleget e mi ne polici kishin shperndar nje deklarat per mediat se jam shoqeruar ende pa me bere asnje lloj verifikimi apo pa me pyetur: si qendron puna? Nuk e kam kercenuar, nuk e kam perndjekur thjesht kam komunikuar ne what’s up me kolegen time dhe shoqen tuaj Gjithashtu edhe kolegeve te mi ne televizione dhe port(h)aleve qe u nguten per te bere lajmin i pari, kush me foto e kush me emer e mbiemer. Faleminderit te gjithve!”, shkruan 26-vjeçari me profesion gazetar.
Njoftimi i Policisë
“Specialistët për Hetimin e Krimeve në Komisariatin e Policisë Mallakastër kapën shtetasin e shpallur në kërkim: S.S, 26 vjeç, banues në Mallakastër. Ky shtetas është shpallur në kërkim për veprën penale ‘Përdorimi me keqdashje i thirrjeve telefonike’ pasi me anë të telefonit ka kanosur shtetasen A.T.”, njoftoi policia.
“Shtetasi S.S iu dorëzua shërbimeve të Komisariatit të Policisë Nr. 4 Tiranë për veprime të mëtejshme proceduriale”, shtuan të njëjtat burime policia.
Burime policore thanë se 26-vjeçari, me anë të telefonit, ka kontaktuar A.T., duke e ngacmuar. Vajza ka bërë kallëzim në komisariatin 4 në Tiranë, që ka shpallur në kërkim të riun.