Nisjen e vitiit të ri akademik, studentët e kanë nisur me protestë para ministrisë së Arsimit dhe Sportit. Në këtë vit të ri akademik ata kanë hasur sërish problemet e vjetra dhe se premtimet e qeverisë pas kanë qenë gënjeshtra.
Nga MAS ku ishin mbledhur studentët bënë dhe një deklaratë për mediat ku u shprehë se ky vit do të shënojë fillimin e një jete të re për të rinjtë dhe universitetin publik sepse do ta rrëzojmë ligjin famëkeq për arsimin e lartë, por beteja nuk do të jetë e lehtë.
Sipas studentëve, qeveria ka ndërtuar arsenalin e saj të gënjeshtrave duke pretenduar në mënyrë të gënjeshtërt se ka përgjysmuar tarifat, se ka krijuar kartën studentore dhe se u ka dhënë drejtim shqetësimeve të tyre.
Deklarata e plotë:
Nuk mbulohet ligji me pakt!
Ky vit akademik nuk është si të tjerët. Ai vjen pas vitit që shënoi protestën më mbresëlënëse të 30 viteve të fundit. Ky vit do të shënojë fillimin e një jete të re për të rinjtë dhe universitetin publik sepse të gjithë ne do ta rrëzojmë ligjin famëkeq për arsimin e lartë.
Beteja jonë nuk do të jetë më e lehtë. Qeveria ka ndërtuar arsenalin e saj të gënjeshtrave duke pretenduar në mënyrë të gënjeshtërt se ka përgjysmuar tarifat, se ka krijuar kartën studentore dhe se u ka dhënë drejtim shqetësimeve të studentëve.
Tarifat e baçelorit janë ulur vetëm për një pjesë gjithnjë e më të vogël studentësh. Tarifat e masterit nuk janë ulur pothuajse për asnjë student dhe vijojnë të mbeten nga më të lartat në Evropë. Sa kohë të mbetet në fuqi ligji i arsimit të lartë, tarifat mund të ngrihen në çdo moment për shkak të financimit nga shteti të universiteteve private.
Karta e Studentit më shumë se sociale është kartë elektorale. Ajo ofron shërbime vetëm në rrafshin e muzeve dhe asnjë ndihmë sa i përket qirave, ushqimeve, rrobave, librave, telefonisë dhe transportit ndërqytetas. E mbi të gjitha, buxheti për arsimin është ulur rreth 3 milionë euro.
Abuzimet e drejtuesve universitarë dhe pedagogëve të korruptuar vazhdojnë si më parë, ndërkohë që për të sapodiplomuarit ka vetëm dy alternativa: call center-i ose emigracioni.
Ne do ta vazhdojmë betejën. Jemi në vitin e gjashtë të saj dhe nuk do të ndalemi derisa të përmbysim ligjin, tarifat, abuzimin dhe realitetin e papunësisë te të rinjtë e arsimuar. Një dimër i ftohtë e i gjatë na pret përpara. Bash për këtë arsye duhet dhe do të mobilizohemi. Sakrifica e prindërve tanë, ideali i arsimit publik për të gjithë dhe besimi te njëri-tjetri janë forca që na bashkon, ajo që do të na shtyjë drejt protestave dhe ndryshimeve të mëdha.
Për universitetin! Për shoqërinë!
