Tre të akuzuarit për vrasjen e Stavri Minos kanë mbërritur sot në gjykatën e Vlorës. Nën masa të rrepta sigurie të prangosur ata kanë dalë para togave të zeza për t’u njohur me masën e sigurisë.
Në gjykatë ata janë pritur nga familjarët e tyre dhe tashmë ka nisur seanca për të vendosur nëse do të rrinë në burg apo do të fitojnë sërish lirinë.
Në fillim kjo ngjarje është raportuar si një vdekje aksidentale, por pas hetimeve Policia deklaroi se Stavri Mino ishte dhunuar dhe ka arrestuar tre autorët. Mësohet se në prangat e policisë kanë rënë Astrit Hameti 48 vjeç, Nusret Hoda, 57 vjeç dhe Agron Hameti, 56 vjeç.
Sipas policisë tre personat në bashkëpunim me njëri-tjetrin në lagjen “1 Maji”, gjatë një konflikti për motive të dobëta kanë goditur fizikisht 56-vjeçarin.
Viktima u ndesh me tre autorët dhe gjatë përleshjes u përplas me një pjesë betoni duke humbur menjëherë jetën. Shkak i këtij sherri ka qenë një konflikt për pronën.
