Nga Boldnews.al
Gentian Balla, i dënuar më parë me 20 vjet burgim për armëmbajtje pa leje dhe vrasje me dashje, ngjarje e ndodhur në vitin 1997, është vënë sërish në pranga. Burime zyrtare nga policia konfirmuan këtë të martë se ai u arrestua në Shijak për akuzat “Mbajtja pa leje e armëve dhe municioneve luftarake” dhe “Mosbindja ndaj urdhrit të punonjësit të policisë”.
Aksioni
Një informacion se Gentian Balla lëvizte me armë zjarri solli organizimin e aksionit “Magnum 2”, nga blutë e komisariatit të Shijakut në bashkëpunim me Forcat Operacionale të Drejtorisë së Policisë së Durrësit. “Në kuadër të operacionit, duke marrë parasysh rrezikshmërinë e personit, u ngritën pika kontrolli grackë dhe u bë i mundur identifikimi i automjetit me të cilin lëvizte personi i dyshuar. Në momentin që Policia ka ndërhyrë për të ndaluar ndaluar automjetin, 40-vjeçari Gentian Balla, banues në Shijak ka braktisur mjetin dhe ka tentuar të largohet me vrap duke hedhur edhe armën e zjarrit në tokë, por është kapur dhe prangosur në flagrancë nga shërbimet e policisë, të cilat kishin ngritur perimetër sigurie për të mos lejuar largimin e tij. Në përfundim të veprimeve u bë arrestimi në flagrancë për veprat penale ‘Mbajtja pa leje e armëve dhe municioneve luftarake’ dhe ‘Mosbindja ndaj urdhrit të punonjësit të policisë’, si dhe u sekuestrua në cilësinë e provës materiale arma e zjarrit pistoletë, me 13 fishekë luftarakë dhe automjeti tip Benz”, njoftoi policia.
Lirimi nga qelia me ndihmën e vëllait të deputetit të Durrësit
Një vendimi i Gjykatës së Lartë, dhënë më 12 Mars 2014, zbulon rolin e vëllait të deputetit socialist Ilir Ndraxhi në lirimin e parakohshëm nga qelia të Gentian Ballës.
Gentian Balla rezulton i dënuar me 20 vjet burgim për kryerjen e veprës penale të “Vrasjes me paramendim”, në bashkëpunim dhe “Mbajtjes pa leje të armëve luftarake”, me vendimin datë 08.02.2002 të Gjykatës së Rrethit Gjyqësor Durrës. Vendim i cili është lënë në fuqi edhe nga ana e Gjykatës së Apelit Durrës.
Gjykata e Rrethit Gjyqësor Kavajë, ka vendosur rrëzimin e kërkesës së paraqitur nga kërkuesi.
Gentian Balla ka kërkuar lirim me kusht duke iu drejtuar Gjykatës së Kavajës. Por, gjykata ja ka hedhur poshtë kërkesën me një vendim të datës 20 Maj 2013.
Balla ka ankimuar vendimin dhe Gjykata e Apelit Durrës, më datë 21.11.2013 ka vendosur ndryshimin e vendimit të gjykatës së rrethit gjyqësor Kavajë dhe pranimin e kërkesës për lirim me kusht të paraqitur nga Gentian Balla.
Kundër vendimit, ka paraqitur rekurs Prokuroria e Apelit Durrës.
Në fund, Gjykata e Lartë vendosi të lërë në fuqi vendimin e Apelit të Durrësit, që i dha lirinë e parakohshme Gentian Ballës.
Në vendimin e zbardhur të Gjykatës së Lartë, zbulohet se një rol vendimtar në lirimin nga qelia të Gentian Ballës, ka qenë një kontratë pune e kompanisë ‘Glan’ shpk me të dënuarin për vrasje: “Ka rezultuar nga kontrata e premtim punësimit me Shoqërinë ‘Glan’ shpk Durrës se kjo shoqëri premton të marrë në punë shtetasin Gentian Balla kundrejt detyrimeve reciproke, për të ndihmuar gjendjen ekonomike të familjes së tij, pasi nuk ka asnjë pjesëtarë në marrëdhënie pune”.
Sipas të dhënave të Qendrës Kombëtare të Biznesit, kompania “Glan” shpk rezulton në pronësi të Arjan Ndraxhit, vëllait të deputetit socialist të Durrësit, Ilir Ndraxhi.
Lidhja me Avdylajt
Gazeta gjermane BILD, në vazhdën e përgjimeve nga dosja 339, që tregon bashkëpunimin e socialistëve me elemente kriminale në zgjedhjet parlamentare të 2017-ës, ka publikuar komunikime të Arjan Ndraxhit me Asrtit Avdylajn.
Astrit Avdylaj, i njohur si kreu i bandës “Avdylaj” në Shijak telefonon Arjan Ndraxhin, vëllai i Ilirit (Ilir Ndraxhi), që më vonë do të bëhehj deputeti i ardhshëm i PS. Nga përgjimet, zbulohet se Avdylajt kanë kërkuar që Ilir Ndraxhi të jetën kandidat për deputet të Durrësit në listën e PS. Në telefonatën me Arjan Ndraxhin, Astrit Avdylaj zotohet se do të punojë fort, aq sa dhe kryeministri Rama do të surpizohet, me një rezultat pozitiv 10 me 0. Në përgjigje, del dhe angazhimi në fushatën e PS e Astrit Avdylajt, tanimë pas hekurave për trafik droge.
Ilir Ndraxhi konfirmohet më pas si kandidat i PS për deputet në Durrës.
PËRGJIMI 3 I BILD/ Zotohet Avdylaj: Do e habis Ramën me një 10-çe …
