Ish-futbollisti shqiptar, Aldi Cala është gjetur i vdekur në banesën e tij në Itali, të shtunën.
24-vjeçari natën e kishte kaluar me miqtë e tij, teksa ishte kthyer në shtëpi në orët e para të mëngjesit të së shtunës.
Sipas raportimeve nga gazeta Italiane, “La Nazione”, prindërit e tij duke menduar që ishte i lodhur e lanë të pushonte më vonë se zakonisht. Por kur panë që diçka dukshëm nuk shkonte, ata vendosën të hynin në dhomën e tij me forcë duke zbuluar më pas ngjarjen tragjike.
Momentalisht shkaku i hollësishëm mbetet mister por mjekët thonë që vdekja ka ardhur nga shkaqe natyrale dhe dyshohet për një arrest kardiak.
Trupi u transportua në morgun e ‘’Campo di Marte’’ në pritje të përgjigjes së ekspertëve për të përcaktuar përfundimisht shkaqet e vdekjes.
Sipas familjarëve të ish-futbollistit, ai bënte një jetë të rregullt larg substancave narkotike apo alkoolit.