Ka nisur prej orës 07:00 procesi i zgjedhjeve të parakohshme parlamentare në Kosovë.
Votimi ka nisur me pak probleme të vogla, që janë regjistruar në disa qendra votimi në aspektin e orarit.
Nga të dhënat e para, mësohet se në shkollën teknike në Mitrovicë ka një fluks votuesish.
Përgjegjësit e kësaj qendre kanë bërë të ditur se nga ora 7:00 deri në 7:15 kanë votuar 33 persona.
“Këtu votojnë më së shumti njerëz nga pakica serbe. Përgjegjësit e qendrës na kanë thënë se po shënohet rekord për shkak se deri tani kanë votuar 33 persona”, raportojnë gazetarët për mediat vendase.
Zyrtarja e parë që ka votuar është Kryetarja e KQZ-zë, Valdete Daka, e cila i ka bërë thirrje të gjithë qytetarëve dhe subjekteve politike që të kenë kujdes në procesin zgjedhor.
“E përfundova obligimin tim qytetar. I ftoj gjithë qytetarët dhe subjektet politike si dhe komisionarët që të kenë kujdes, pra ta kemi parasysh që çdo gjë që ndodh në fund të kësaj dite do ti faturohet Kosovës”, u shpreh Daka.
“T’i tregojmë të gjithëvë që kemi kulturë demokratike dhe dijmë të votojmë”, tha ajo.
Janë 1,937,869 persona që sot kanë të drejt vote, të cilat do të kenë mundësi të votojnë për 20 parti politike, katër koalicione dhe 1 kandidat të pavarur, me 1 067 kandidatë për deputetë.
Numri i Qendrave të Votimit është 895 me 2 mijë e 547 vendvotimeve. Kurse, numri i votuesve të rinj në këto zgjedhje është 111 mijë e 733 votues.
Komisioni Qendror i Zgjedhjeve ka bërë të ditur se këto janë zgjedhjet e shtata më radhë për Kuvendin e Kosovës.
“KQZ-ja ka certifikuar 25 subjekte politike (20 parti politike; 4 koalicione; dhe 1 kandidat të pavarur) për pjesëmarrje në zgjedhje me gjithsej 1 067 kandidatë për deputetë (F 343; M 724)”.
“Në këto zgjedhje numri i qytetarëve me të drejtë vote është 1 milion e 937 mijë e 868 votues, ndërkaq numri i qendrave të votimit është 895 me gjithsej 2 547 vendvotime”.
“Komisioni Qendror i Zgjedhjeve ka planifikuar të mbajë disa konferenca gjatë ditës së sotme për të informuar lidhur me pjesëmarrjen e votuesve në zgjedhje dhe ecurinë e procesit zgjedhor, në orën 08:00; 11:30; 15:30; 19:30 dhe për konferencën ku do të publikohen rezultatet preliminare KQZ-ja do të informojë më vonë”.
Në këto zgjedhje, postin e kryeministrit po e synojnë 7 kandidatë nga subjekte të ndryshme politike.
