Nga Bolnews.al
Fatmir Xhafaj dhe vëllai i tij, Agron (Geron) Xhafaj kanë varur shpresat tek një kriminel ordiner, i pari për të “shpëtuar” imazhin e tij politik dhe i dyti për të “shpëtuar” nga akuzat për vijimin e trafikut të narkotikëve.
Alizoti është “dëshmitari i rremë” i përdorur nga Policia dhe Prokuroria për të rrëzuar deklarimet e shtetasit Albert Veliu, i cili është shprehur publikisht se Geroni, vëllai i ish-ministrit të Brendshëm, Fatmir Xhafaj, vazhdon aktivitetin e paligjshëm të trafikut të narkotikëve, vepër penale për të cilën është dënuar më parë në Itali me 7 vjet burgim.
“Boldnews.al” ka siguruar disa vendime gjyqësore, në të cilat “mbrojtësi” i imazhit të Xhafajve rezulton se është arrestuar dhe dënuar në mënyrë periodike për akuzat e vjedhjes me dhunë dhe armbëmbajtjes pa leje.
Këto vendime japin një dëshmi të qartë për karakterin dhe personalitetin e personit, tek i cili vëllezërit Fatmir dhe Agron (Geron) Xhafaj shpresojnë të marrin mbështetjen për të shpëtuar nga ndërlikimet e mëtejshme politike dhe ligjore.
Kërcënimi me kallash për një gotë raki
Pasditen e 17 Tetorit të vitit 2000, “dëshmitari i rremë” Fredi Alizoti dhe dy miq të tij, shkojnë në lokalin e shtetasit F.R., në Fier. Në ato momente, klientëve u shërbente vajza e pronarit, shtetasja S.R.
Alizoti dhe dy miqtë e tij ishin në gjendje të dehur dhe po krijonin probleme për klientët e tjerë. Për këtë arsye, pronari i lokalit, F.R., i kërkon Alizotit dhe dy miqve të tij që të largohen, pasi nuk u shërbenin dhe se bari ishte mbyllur.
Ky qëndrim i pronarit të lokalit nuk i ka pëlqyer “dëshmitarit të rremë” të Xhafajve, Fredi Alizoti, i cili ka kërcënuar pronarin e lokalit dhe familjarët e tij se “do të kthehej shumë shpejt dhe do e shihnin se çfarë do t’u bënte”.
Fredi Alizoti dhe miqtë e tij janë larguar nga lokali, ndërkohë që pronari i biznesit ka telefonuar menjëherë policinë, për të shmangur përplasjet e mëtejshme.
Rreth 10 minuta më pas, Alizoti rikthehet tek lokali me një automjet, së bashku me shtetasin Altin Nika. Sapo zbresin nga makina, Fredi i jep Altinit një automatik kallashnikov, ndërkohë që për vete mban një thikë, të cilën e vendos pas kurrizit.
Në momentin që dy agresorët po afroheshin tek lokali, aty mbërrin edhe një patrullë policore, e njoftuar më parë nga pronari i lokalit.
Duke parë që po vinte policia, shtetasi Altin Nika hedh kallashnikovin mbi tarracën e lokalit dhe largohet me vrap. Ndërsa bashkëshortja e pronarit të lokalit arrin të bllokojë Fredi Alizotin, duke i marrë edhe thikën. Në ato çaste ndërhyjnë forcat policore, të cilat e arrestojnë “dëshmitarin e rremë” Alizoti.
Për këtë ngjarje, gjykata e Fierit e ka shpallur fajtor Fredi Alizotin, në 1 Shkurt 2001, me 5 muaj burgim, për veprat penale të “mbajtjes pa leje të armëve luftarake” dhe “të armëve të ftohta.
“Dëshmitari i rremë”, Alizoti, nuk ka qenë dakord me dënimin dhe e ka ankimuar vendimin. Gjykata e Apelit të Vlorës, në Prill të vitit 2001, ka vendosur mospranimin e ankimit, duke lënë në fuqi, në këtë mënyrë, vendimin e dënimit të dhënë nga shkalla e parë.
