Edi Rama ka filluar të flas si lac, nuk njeh rekomandimet e OSBE/ODIHR ndaj dhe flet ashtu si flet. Kështu deklaroi mbrëmjen e sotme në Syri.net, Kreu i PD-së, Lulzim Basha, sipas të cilit rekomandimet e OSBE/ODIHR synojnë të ndalin shitblerjen e votës.
Basha tha se një reformë e thellë zgjedhore, sikundër propozon opozitës, do të çarmatosë Edi Ramën nga skemat dhe individët për manipulimin e zgjedhjeve dhe blerjen e votave.
I pyetur lidhur me depolitizimin e komisioneve zgjedhore, Basha tha se në një vend që është e vështirë të gjesh qoftë edhe një kandidat të pavarur për Kryeprokuror, vështirë se mund të gjesh njerëz të depolitizuar për të ndërtuar komisionet zgjedhore.
Përsa i takon deklaratës së Ramës se është i gatshëm për t’u takuar me opozitën edhe në selinë e PD-së, Basha tha se ai nuk është i mirëpritur në selinë e PD.
“Sharlatani nuk mund të vijë të bëjë lojra, PD e do Edi Ramën para drejtësisë. Ai ka planin e zgjidhjes së krizës në tavolinë, ta zbatojë ose të hapë krahun.
Edi Rama është njeri i mbaruar politikisht dhe moralisht, Shqipëria është në krizë, njerëzit duan zgjidhje dhe Rama ose duhet të pranojë zgjidhjen ose duhet të hapë krahun.
Nuk zgjidh asnjë gjë takimi me Ramën apo tryeza.
Nuk mundet më Rama të shpresojë që do të lajë llumin e tij me një foto me liderin e opozitës”, tha Basha.
