Kreu demokrat Lulzim Basha dhe Kryeministri Edi Rama duhet të heqin dorë nga ky sistem zgjedhor që mbajnë në fuqi, pasi duke hequr dorë nga ky sistem, ata heqin dorë nga pushteti i tyre absolut.
Apeli ndaj Bashës dhe Ramës është bërë nga Astrit Patozi, drejtues i Bindjes Demokratike, një prej subjekteve të krijuara në prag të votimeve të 30 qershorit, duke qenë gjithashtu një nga partitë që morën pjesë në këtë proces.
Patozi thotë se ky sistem ka prodhuar një realitet politik të deformuar që desh na çoi edhe në luftë civile. Patozi paralajmëron një fund të tmerrshëm për ta, nëse zgjedhin si të dy bashkë, si njëri apo tjetri të mbajnë këtë sistem zgjedhor në fuqi.
Kreu i Bindjes Demokratike beson se si Bashës ashtu edhe Ramës i ka mbetur pak koshiencë politike për të ndërmarrë një hap kurajoz që do të krijonte një klimë të re politike në Shqipëri.
Patozi gjatë intervistës në Top Talk doli edhe me një propozim surprizues, ku tha se duhet të përfshihet në ligj detyrimi për të votuar.
Kjo sipas tij do të rriste angazhimin politik të shqiptarëve, pasi ky sistem që kemi ka dekurajuar popullsinë të shkojë në zgjedhje.
Angazhimi i më shumë njerëzve për të votuar do të krijonte realitete të reja politike dhe do ta bënte më legjitime çdo qeveri të zgjedhur.
