Aksioni i IKMT-së, i nisur disa ditë më parë për pastrimin e vijë bregdetare nga ndërtimet pa leje prej dy ditësh është ndalur në Radhimë. Edhe gjatë ditës së sotme, IKMT ka vazhduar prishjen e godinave edhe pse në kundërshtim më pretendimet e banorëve që jetojnë dhe punojnë aty.
Përgjatë dy ditëve të fundit aksioni është shoqëruar me incidente të shumta pasi pronarët e bizneseve pretendojnë se shembja e objekteve po bëhet në mënyrë selektive. IKMT njoftoi dje se deri më tani janë prishur 15 objekte nga 60 që parashikon projekti. Ndërkohë që drejtoresha e IKMT Dallëndyshe Bici u shpreh se aksioni do të vijojë për 51 objekte ndërkohë që për pjesën tjetër do të shprehet Agjencia e Pronave
Në fillim të muajit shtator, IKMT nisi aksionin për prishjen e ndërtimeve në bregdet duke nisur nga zona e Ujit të Ftohtë, aty ku është parashikuar projekti i Lungomare 2 që do të shtrihet deri në afërsi të tunelit në Vlorë.
