Pak më herët raportuam se aktori i njohur Neritan Liçaj ishte kërcënuar me largim nga vendi i punës dhe se kjo është konfirmuar nga burime të tij brenda kryeministrisë.
Në një lidhje telefonike me Fax News, Liçaj e ka rikonfirmuar lajmin ndërsa ka theksuar se është i bindur se kjo bëhet nga Rama dhe Veliaj, ndërsa shton se kjo vetëm sa i ka forcuar pozitat e tij dhe të Aleancës për Mbrojtjen e Teatrit.
I pyetur se pse është ndërmarrë një veprim i tillë ndaj tij, aktori tha se bëhet për shkak të qëndresës prej rreth një viti e gjysmë në mbrojtje të Teatrit dhe ndikimit që ka pasur personalisht në këtë qëndresë.
“Jam informuar sot se po përgatitet shkarkimi im nga puna, nuk e di motivin, s’kam informacion tjetër dhe nuk më kanë thirrur për të ma thënë, por që qëllimi është i qartë: Bëhet për shkak se po qëndroj tek Teatri. Kjo është një gallatë dhe qyfyre shumë e madhe e më vjen vërtetë për të qeshur sepse punën unë e bëj si duhet. Kryeministri dhe kryetari i bashkisë e kanë marrë këtë vendim për të më shkarkuar jam shumë i bindur. Nuk kam informacion për persona të tjerë që janë kërcënuar në një formë të tillë, ku pavarësisht se ka pasur edhe të tjerë që kanë treguar kundërshtim për prishjen e Teatrit Kombëtar, por që kam dalë çdo ditë dhe që kam qenë shumë aktiv jam vetëm unë. Kam qenë shumë më i dukshëm se të tjerët dhe më evident pasi kam marrë pjesë në protesta, takime në ambasada, e kudo. Kam qenë kundërshtues i fortë, jemi përplasur me policinë kur kryeministri bëri aktin më të turpshëm ndaj Teatrit. Kjo ka të bëjë me kundështimin e ashpër dhe të fortë, dhe mbase duan të më bëjnë shembull por në fakt kjo tregon fytyrën e tyre.
Nëse më heqin nga puna, do të ndjek të gjitha hapat juridike, kam studio shumë të fuqishme ligjore që do të më mbrojnë. Do të shkoj në ambasada, institucione, tek presidenti, media. Shkurt do të bëj gjithçka për t’jua ç’jerrur atë pak maskë që u ka mbetur. Do t’ju nxjerr gjithë Shqipërinë kundër, sepse e kanë gjithë Shqipërinë kundër. Mendoj se jam një aktor i mirë dhe besoj se jam në krehun e drejtë, ata janë në krahun e gabuar.
Nëse do të merrej një vendim i tillë, vetëm sa do ta forconte Aleancën për Mbrojtjen e Teatrit, e kanë forcuar që tani pasi ka pasur me qindra reagime për këtë rast. Kjo është një kravatë që më zbukuron dhe dhuratë shumë e madhe e cila nuk më lë të vetëm, ata janë vetëm. Kam pasur shumë telefonata për të më mbështetur se si do të më ndihmojnë dhe ata e dinë fare mirë se sa të fuqishëm jemi. Përderisa kemi rezistuar për një vit e gjashtë muaj, ata e dinë se jemi një aleancë shumë e fortë me mbështetje qytetare, politike, juridike”, tha Liçaj për Fax News.
