Avokati i njohur Ledio Braho tha se ndryshimet në Kodin Penal rëndojnë disa nga veprat penale, rëndojnë rrethanat, përsa i përket kur ato kur kryhen ndaj funksionarëve shtetërorë ose Policisë së Shtetit.
Braho tha se referuar ndryshimeve, bllokimi i rrugës, si në rastin e protestave te Unaza e Re, konsiderohet vepër penale dhe dënohet me burgim nga 1 në 3 vjet, pavarësisht faktit nëse banorët vendosin ose jo pengesa, mjafton që të bllokohen mjetet.
“Nuk ka një studim të mirëfilltë mbi ndryshimet e realizuara në Kodin Penal, që mendojnë se vijnë nga nevoja immediate e qeverisë për të kriminalizuar disa vepra, siç është kjo e pengimit të qarkullimit të automjeteve”, tha Braho.
Avokati thotë se të gjitha ndryshimet, përveç atyre që i përkasin fushës së mjekimit të pakujdeshëm, sportit dhe mjedisit, të tjerat janë ndryshime që shkojnë vetëm në favor të funksionarëve shtetërorë.
Braho tha se normalisht kur bëhen ndryshime të tilla në Kodin Penal duhet të ketë një studim të mirfilltë mbi shkaqet sepse po bëhen ato.
“Përsa i takon bllokimit të automjeteve, shkaku është marrë pikërisht nga protesta e ligjshme e banorëve të Unazës së Re. Protesta të tilla ne kemi parë në të gjitha botën, së fundmi në Francë, por s’ka procedime të tilla, sikundër ndodh në Shqipëri”, tha avokati i njohur.
Në vijim ai sqaroi se nëse do të ketë procedime penale ndaj qytetarëve, mendoj se ato do të hetohen në gjendje të lirë, lidhur me bllokimin e qarkullimit të mjeteve, pasi vepra penale në rastin konkret nuk konsiderohet e rëndë.
“Por nëse do të ketë masa arresti për këto vepra penale, atëherë kjo tregon se prokuroria është i kapur nga mazhoranca”, tha Braho.
Në vijim, avokati i njohur, tha se fatkeqësisht Shqipëria nuk ka një opozitë, por një parlament monopartiak, që i shërben mazhorancës.
