Avokati Ledio Braho tha se drafti i Komisionit të Venecias lidhur me shkeljen ose jo nga Presidenti i Kushtetutës, nuk duhej të ishte bërë publik.
Braho tha se Komisioni i Venecias nuk ka mbajtur asnjë qëndrim lidhur me publikimin e këtij dokumenti, i cili sipas rregulloreve të vetë komisionit nuk duhej të bëhej publik për rreth 1 vit.
“Kemi një draft-raport, i cili nëse është i vërtetë, do të votohej nga Komisioni i Venecias për t’u kthyer në raport. Kjo do të thotë se nëse dokumenti në fjalë që u publikua është një draft që mund të ndryshohej nga Venecia, dhe duke e publikuar ka pasur vetëm një qëllim: deligjitimin e Presidentit të Republikës”, tha Braho.
Avokati i njohur tha se sipas mazhorancës ka një opinion negativ se Presidenti ka shkelur Kushtetutën, ndaj e drafti u publikua.
“Opinioni i Komisionit të Venecias ishte një interpretim fjalë për fjalë i Kushtetutës, duke evidentuar si shkelje atë të anullimit të mbajtjes së zgjedhjeve.
Por në anën tjetër kemi edhe evidentimin e faktit se shkelja nuk është aq e rëndë sa Presidenti të shkarkohet”, tha Braho.
Sipas tij, Komisioni i Venecias kërkon që kjo procedurë të mos vazhdojë, për faktin se një situatë e tillë do të ndikonte në ngritjen e një Gjykate Kushtetuese nën presion.
“Kandidatët për Gjykatën Kushtetuese përzgjidhen nga Kuvendi, Gjykata e Lartë dhe Presidenti, dhe në kushte të tilla kur Kushtetuesja duhet të përballet me një çështje të tillë, atëherë kuptojhet se do të synohet ngritja e një gjykate jot ë pavarur”, tha Braho.
