Banorët e Orikumit së bashku me bizneset të cilat veprojnë në zonën e Karaburunit dhe Pashalimanit kane dalë këtë të hënë në proteste në hyrje të bazës ushtarake të Pashalimanit.
Protesta e banoreve, por dhe firmave kryesisht të peshkut që ushtrojnë biznesin e tyre në Pashaliman vjen pasi ne bazën ushtarake te Pashalimanit, me urdhër nga Ministria e mbrojtës, është vendosur një orar zyrtar. Nga ora 8 deri në orën 15, të tilla biznese do të lejohen të hyjnë dhe të dalin nga baza e Pashalimanit, ndërsa pas kësaj ore hyrja ndalohet. Bizneset kryesisht të peshkut janë kundra këtij orari pasi për ta, i tillë orar dëmton punën e tyre. Sipas tyre, biznesi i peshkut nuk ka nevojë për orar, pasi puna e tyre nuk ka kohe.
Jenë rreth 200 punonjës të firmave të peshkut, por dhe bletërritës si dhe çoban në stan te cilët rrisin bagëtinë që janë kundra këtij urdhri. Bizneset i kane dërguar ankesën e tyre ministrisë së mbrojtjes dhe presin zgjidhe, në të kundër kanë paralajmëruar se do e përshkallëzojnë protestën e tyre. Rruga për në hyrje të Pashalimanit ka rreth 90 minuta e bllokuar, që prej fillimit te protestës rreth orës 7 të mëngjesit.
