Rudina Hajdari, deputete e opozitës së re, duket se nuk po ambjentohet me seancat parlamentare. Në çdo seancë ajo merr fjalën në foltore, por duket se nuk është ambientuar ose me sallën ose me gjuhën shqipe.
Së fundmi, deputetja e opozitës së re, pasi foli për ndryshimin e sistemit zgjedhor, dhunën ndaj grave, vendosi të flasë edhe për problemin e banorëve të Laprakës, zonë në të cilën ajo u angazhua në fushatën e zgjedhjeve të 25 qershorit 2017, si kandidate e PD-së.
Hajdari ngriti shqetësimin e dy fabrikave, një alumini dhe një tullash, që operojnë pa leje mjedisore, por u ngatërrua aq shumë me atë që donte të thoshte, sa vështirë se mund të kuptohej se cili ishte shqetësimi real.
Në fakt për dy fabrikat, qindra banorë të Laprakës, protestojnë prej javësh dhe kërkojnë ndërhyrjen e institucioneve shtetërore, pasi ajri që ata thithin është tejet i ngarkuar për shkak të gazrave dhe tymit që lëshojnë fabrikat kur vihen në funksionim.
Gjithsesi me ngatërresat që bëri, duke zgjatur sa më shumë problemin, Hajdari bëri gafën e rradhës, kur e quajti Laprakën kryeqytetin e Tiranës.
Në fakt ajo ka dashur të thotë që kjo ndodhte në Tiranë, kryeqytetin e Shqipërisë, por duket se nga emocionet, ose mënyra se si u përpoq të trajtonte problemin, bëri një lëmsh.
