Nënkryetari i Bashkisë Tiranë, Arbian Mazniku ka përfunduar dëshminë e tij në prokurorinë e Tiranës.
Mazniku ka folur për mediat që ishin të pranishme tek prokuroria, duke mos dhënë detaje në lidhje me shkeljet që ka bërë, por ka sulmuar mediat që kanë publikuar dokumentet për pagesën që Shkëlqim Fusha ka bërë për dhomën e tij të hotelit në Spanjë.
‘I kënaqur që dhashë informacionin e duhur. E vërteta do të dalë dhe do të mundë këto ‘fake news’. Me këto fakte do të shpjegohet e vërteta’, u shpreh Mazniku, cili nuk pranoi të flasë në lidhje me atë që ishte pyetur në prokurori.
Prokuroria ka nisur hetimet në fillim të shtatorit, pas denoncimeve në media si dhe nga Partia Demokratike se ‘pronari i ‘Fusha shpk’ ka paguar hotelin 908 euro nata në Barcelonë, për Maznikun në konflikt të pastër interesi pasi kjo kompani është përfituesi më i madh i punëve publike në kryeqytet.
‘Në media është publikuar një faturë e një hoteli luksoz në Barcelonë, ku nënkryetari i bashkisë Arbian Mazniku është akomoduar për të pushuar në një dhomë për të cilën është paguar 908 euro nata. Kjo është fatura e numrit dy të bashkisë i cili për dy net në hotel `Alma Barcelona` ka shpenzuar 1816 euro. Pagesa është bërë Shkëlqim Fusha nëpërmjet kartës së kreditit. Pra, përfituesi më i madh i parave publike nëpërmjet bashkisë së Tiranës dhe qeverisë së Edi Ramës paguan dhomat luksoze të hotelit për zyrtarët e bashkisë të cilët prej 4 vitesh nuk kanë kursyer firmat për tenderat qindra miliona euroshe për të’, denoncoi në atë kohë Partia Demokratike