Është kthyer në ritual tashmë plani i masave që policia e Shtetit merr çdo fundjavë me qëllim parandalimin e aksidenteve rrugore. Kështu, ka ndodhur edhe këtë javë, ku siç njofton policia e Shtetit janë arrestuar 22 shoferë, janë pezulluar 94 patenta, si edhe janë vendosur rreth 5 mijë gjoba. Në njërin nga rastet, policia ka konstatuar një shofer të dehur, i cili pasi i ka fryrë tubit ka rezultuar se ka qenë 0.75 mg/l nën ndikimin e alkoolit.
Njoftimi i plotë:
Policia Rrugore. Gjatë fundjavës, në të gjithë vendin: 22 drejtues mjetesh dhe motomjetesh të arrestuar, 94 leje drejtimi të pezulluara dhe 4 671 masa administrative të vendosura.
208 denoncime nga qytetarët për shkelje të ndryshme të Kodit Rrugor.
Në kuadër të masave për parandalimin e aksidenteve rrugore, si dhe në zbatim të detyrave të përcaktuara në Planin e Masave për rritjen e parametrave të sigurisë rrugore, gjatë fundjavës Policia Rrugore në të gjithë vendin ka ushtruar kontrolle duke përdorur drager e radarë, si dhe duke aplikuar monitorimin e qarkullimit me punonjës civilë të Policisë Rrugore.
Gjatë fundjavës, në të gjithë vendin u angazhuan 951 punonjës të Policisë Rrugore dhe gjatë kontrolleve duke përdorur aparatin drager u evidentuan dhe u arrestuan 14 persona për drejtim mjeti në gjendje të dehur, 8 persona për drejtim mjeti apo motomjeti pa Leje Drejtimi.
Kontrollet kanë vijuar edhe për evidentimin dhe ndëshkimin e drejtimit të mjetit nën efektin e alkoolit apo për shpejtësi tej normave të lejuara, gara shpejtësie, qarkullim në sens të kundërt, shkelje që ndëshkohen me tërheqje të Lejes së Drejtimit dhe dërgimin në OASH.
