Kryeministri Edi Rama kërkoi pas votimeve të 30 qershorit dorëheqjen e drejtorëve të institucioneve lokale apo atyre në varësi të institucioneve qendrore, duke dhënë si porosi të prerë që shumica e të emëruarve të rinj të ishin gra dhe vajza, njerëz me integritet dhe besueshmëri të lartë.
Por duket se ky proces po shoqërohet me përplasje jo vetëm në strukturat vendore të PS-së, por edhe mes vetë deputetëve, që duket se po masin forcat përsa i takon zonave të influencës.
Burime nga PS konfirmojnë se pavarësisht porosive të Kryeministrit, njëherazi edhe kryetar i PS-së, që emrat që duhen propozuar për pozicionet vakante nuk duhet të jenë më shumë se 3 për çdo institucion, në mjaft raste rezultojnë deri në 10 kandidatë.
Në kushte të tilla duhet që të ketë një përzgjedhje të 2 apo 3 emrave, shprehen burime nga PS, ndërkohë që propozimet janë bërë nga strukturat e PS-së, kryebashkiakët dhe deputetët.
Burimet theksojnë se kryesisht problematike situata paraqitet në bashkitë e mëdha si në Shkodër, Lezhë, Berat, Vlorë, Gjirokastër, Durrës, ku duket se ka një përplasje mes kryebashkiakëve që kanë marrë detyrën pas votimeve të 30 qershorit, grupeve të punës, koordinatorëve dhe deputetëve.
Boldneës.al ka mësuar se emrat që propozohen do të kalohen në sitën e koordinatorëve politikë për 3 rajonet, që kryesohen nga Edi Rama (Veriu), Taulant Balla (Shqipëria e Mesme) dhe Gramoz Ruçi (Jugun), dhe më pas do të jetë vetë kryeministri që do të vendosë mbi drejtuesit e rinj të institucioneve.
Nuk dihet nëse Rama do të përzgjedhë mbi bazën e meritave, profesionalizmit, angazhimit politik, integritetit dhe besueshmërisë së kandidatëve të propozuar, apo ndikim në vendimmarrje do të kenë ata që i suportojnë, pra deputetët apo kryebashkiakët.
Pas votimeve të 30 qershorit dhe problemit të shfaqur me të paktën 3 kryebashkiakë, për shkak të dekriminalizimit, Edi Rama kërkoi ndryshimet e drejtuesve të institucioneve, duke kërkuar dorëheqjen e drejtorëve aktualë.
Mes institucioneve që priten ndryshime janë filialet e postave, drejtuesit Rajonalë të Tatimeve dhe Doganave, Autoriteti Kombëtar i Ushqimit, zyrat arsimore, inspektoriatet e Punës dhe Medisit, zyrat e puns, kadastrave, shërbimit social dhe ato të shëndetit publik.
