Draft-raporti i Komisionit të Venecias, i publikuar në media një ditë më parë, ‘turbulloi’ sërish politikën në vend, duke rihapur edhe njëherë temën nëse do të shkarkohet apo jo Presidenti i Republikës, Ilir Meta, nga mazhoranca aktuale.
I ftuar në Faxweb, avokati i njohur, Ledio Braho, ka zbërthyer në terma ligjorë draft-raportin e Komisionit të Venecias. Sipas avokatit raporti herë e interpreton këtë çështje në mënyrë literale, duke interpretuar fjalë për fjalë Kushtetutën e Shqipërisë, e herë politikisht.
Avokati Braho thekson se opinioni i dalë në media nuk është thelluar në arsyet e vërteta të krizës së rëndë politike në Shqipëri, pasi thotë se kriza ka nisur nga lufta kundër korrupsionit, por që në realitet ne kemi të bëjmë me një krizë të rëndë Kushtetuese.
‘Kemi të bëjmë me një draft opinion nuk është versioni zyrtar. E dyta është se si ka mundësi që ka dalë ky draft, dhe nuk e dimë nëse është ky opinioni që do të votojë Komisioni Venecias. Por sa i përket këtij drafti, mundohet të jetë korrekt dhe bën një interpretim kushtetues, duhet të themi që është interpretim literal, domethënë i refrrohet Gjykatës Kushtetuese. Në një moment flet për cënim të të drejtës së votës, dhe tjetra thotë se shtyrja e zgjedhjeve nuk cënon votën, domethënë ka pak kundërshti. Ajo që është e paqartë është se pse Komisioni i Venecias i referohet si shkak të krizës luftës kundër korrupsionit, kur në fakt nuk është ajo shkak i krizës kushtetuese. Ajo që citohet në opinion është se edhe pse thuhet se ka një dekret të ri për një datë zgjedhjesh, opinioni merr parasysh vetëm një dekret dhe jo tjetrin. Pra diku bën lojë politike diku lojë ligjore literale. Gjithsesi opinioni shkon në favor të presidentit, por thotë dhe që nuk kemi të bëjmë me një shkelje të rëndë kushtetuese, që do të thotë se nuk mund të shkojmë në shkarkimin e presidentit. Sa i përket bojkotit opinioni përcakton se sado peshë në vota të zënë grupe të caktuara politike në një shtet, nuk mund të përcaktohet e drejta e votës’, tha avokati Braho.
Më tej Braho thekson se pavarësisht të gjithave në raport thuhet qartë se shkelja e presidentit nuk është e rëndë, që përkthehet se shtyrja e datës së zgjedhjeve nuk është akt i rëndë Kushtetues, dhe nuk mund të shkohet deri në shkarkim.
‘Kushtetuta e përcakton tek shkarkimi se dihet të jetë shkelje e rëndë e Kushtetutës, dhe tek Komisioni i Venecias thuhet se kjo nuk është një shkelje e rëndë, fakti që ka një datë tjetër nuk e bën këtë shkelje të rëndë, por edhe zhvillimi i zgjedhjeve pa incidente e bën shkelje jo të rëndë’, vijoi Braho.
Ndërkohë sa i përket interpretimeve politike në vend, Braho tha se ky opinion do të përdoret nga Komisioni hetimor i ngritur nga mazhoranca, për të shkarkuar Ilir Metën, pasi rilindja synon të deligjitimojë të vetmin organ Kushtetues që është i pakapur dhe kundër partisë në pushtet.
‘Kjo është çështje e pastër politike. Mazhoranca duke qenë e vetëdijshme se nuk ka Gjykatë Kushtetuese, ngriti një komision hetimor, për të deligjitimuar presidentin në sytë e opinionit publik. Por ajo që është për të ardhur keq është se në tentativën për të deligjitimuar presidentin edhe organi i fundit kushtetues që është kundër mazhorancës po përpiqet të delegjitimohet. Të gjitha organet Kushtetuese janë kapur nga mazhoranca, i vetmi organ i pakaur ëhstë institucioni i presidentit, që po kërkohet të deligjitimojhet. Pra krizë më të thellë Kushtetuese nuk ka. Unë jam i sigurtë se Komisioni Hetimor do ta interpretojë opinionin sipas interesave të veta për të shkuar në shkarkimin e presidentit’, përfundoi Braho.
