CDU-CSU, koalicioni qeverisës në Gjermani, në një njoftim zyrtar të saj, ka sqaruar vendimin e marrë lidhur me negociatat për Shqipërinë dhe Maqedoninë e Veriut me BE-në.
Deklarata qartëson se për Maqedoninë e Veriut është autorizuar Qeveria që të nisë negociatat për në BE, ndërsa për Shqipërinë është rekomanduar hapja në parim e bisedimeve, por janë vendosur kushte të rrepta.
“Ne kërkojmë [për Shqipërinë] kritere shumë më të rrepta se me Maqedoninë e Veriut: funksionimi dhe efikasiteti i sistemit të drejtësisë duhet të rivendoset dhe duhet miratuar vendimi për reformën zgjedhore.
Deri në hapjen e vërtetë të kapitujve, duhen përmbushur kushte të tjera, siç është fillimi i procedurave kundër gjyqtarëve dhe prokurorëve të korruptuar. Prandaj në negociata, kapitujt që do hapen të parët dhe të mbyllen së fundmi do lidhen me sundimin e ligjit dhe drejtësinë”, sqarohet në deklaratën zyrtare të Grupit Parlamentar CDU/CSU.
Vendimi i Bundestagut nuk ndryshon shumë nga ai i një viti më parë, me përjashtim të shtimit të dy kushteve, nga 7 në 9.
Kushtet e reja që i janë shtuar Shqipërisë lidhen me zgjedhjet. Së pari kërkohen arrestime, procedime penale dhe vendime të shpejta për ata që janë përfshirë në blerjen e votave.
Dhe së dyti, Bundestagu kërkon një vendim urgjent të Gjykatës Kushtetuese mbi ligjshmërine e votimeve të 30 Qershorit dhe nëse urdhërohet përsëritja e këtyre zgjedhjeve ato të bëhen mbi bazën e ligjit të ri zgjedhor.
Referuar vendimit të marrë nga grupet e CDU/CSU, duket qartazi se në këndvështrimin e ligjvënësve gjermanë, Maqedonia e Veriut është hapa përpara nga Shqipëria.
Për Maqedoninë propozohet një datë konkrete, ndërsa për Shqipërinë data ka lidhje me plotësimin e kushteve.
Tashmë nuk dihet nëse Rilindja dhe Kryeministri Edi Rama do e cilësojnë ende një vendim apo fitore historike, nëse do të hapin shishe me shampanjë apo do të mendojë se si të plotësojë dy nga kushtet e shtuara, pikërisht ato që lidhen me zgjedhjet.
