Në familjen e Fuat Myrtaj në Kreshpan të njësisë administrative Cakran, nëna, 4 motrat dhe vëllai presin të zbardhet ngjarja e rëndë që ka ndodhur me rrëmbimin e djalit të familjes Fatjon Myrtaj.
Prej 10 ditësh Fatjoni rezulton i zhdukur ndërsa për këtë ngjarje që po hetojnë krimet e rënda janë arrestuar dy kushërinjtë e tyre, Perlat Myrtaj 49 vjcec dhe Ladion Myrtaj 26 vjeç.
Farie Myrtaj 68 vjeçe, nëna e Fatjon Myrtajt kërkon drejtësi për çka ka ndodhur me birin e saj dhe sikurse është shprehur ajo të kthejë të gjallë apo të vdekur në banesë birin e saj.
E pikëlluar nga kjo ngjarje tragjike për familjen e saj 68 vjeçarja ka treguar se biri i saj Fatjoni ka humbur kontaktet me familjarët që prej 10 ditësh ku protagonist të zhdukjes së djalit të saj janë Perlati djali i xhaxhait të Fatjonit si dhe Lajdon Myrtaj i cili jetonte dhe punonte në Kosovë me Saimirin vëllain binjak të Fatjonit.
Ai është paguar nga Perlati për të realizuar skenarin e nxjerrjes në pritë të Fatjonit dhe më pas zhdukjes së tij, ka thënë nëna dhe motra e Fatjon Myrtaj. Rrëmbimi dhe zhdukja e Fatjonit janë zbuluar pasi Lajdoni që jetonte në Kosove është kthyer në Shqipëri papritur dhe i ka kërkuar Fatjonit ta shoqeronte në Vlorë për një porosi.
Fatjoni ka pranuar por pas dy ditësh nuk ka pasur me komunikim më familjarët e tij. Ka qenë Saimiri vëllai binjak i Fatjonit që e njihte mirë kushëririn e tij Lajdonin i cili në mënyrë të papritur ishte kthyer në Shqipëri dhe kishte kërkuar të shoqërohej në Vlorë nga Fatjoni dhe kishte kërkuar shpjegime përse ishte takuar me vëllain e tij si dhe ku ishte.
Pasi ka parë që Lajdoni fshihte diçka i ka kërkuar të shkonin në Shqipëri. Pasi janë kthyer, Saimiri vëllai i Fatjonit të zhdukur e ka çuar në polici ku në prezencë të policisë Lajdoni ka pranuar se është paguar nga Perlati për ta nxjerrë në shteg dhe për të bërë të mundur zhdukjen e Fatjon Myrtaj. Perlat Myrtaj dhe Laidon Myrtaj janë arrestuar nga policia por familjarët nuk kanë asnjë njoftim për fatin e djalit të tyre.
Të afërmit e Fatjon Myrtaj kanë denoncuar që në datë 20 Shtator 2019 se familjari i tyre është zhdukur që në datën 17 Shtator dhe nuk dinin asgjë për fatin e tij. Në kallëzimin e tyre, familjarët e Fatjonit kanë drejtuar gishtin e akuzës mbi Perlat Myrtajn, si personi që gjendet pas kësaj ngjarjeje.
Rrëfimet e familjarëve
Në një komunikim që kanë pasur sot me familjarët e Fatjonit kërkojnë gjetjen e djalit të tyre, dhe të gjitha akuzat i ngrejnë mbi Perlatin, dhe një tjetër person të arrestuar ,Ladion Myrtaj.
Motra e Fatjonit, Stolie Buzi tregon ngjarjen ku para 2 muajsh pati një zenkë në mes të fisit Myrtaj.
Mësohet se Fatjon Myrtaj ka marrë një borxh prej 5 milionësh të vjetra për kurimin e nënës së tij nga nusja e nipit të Perlat Myrtaj , Ridvanit, pa dijeninë e këtij të fundit.
Pavarësisht se Stolie Buzi pretendon se borxhin e kanë shlyer, familja këmbëngul që kjo është bërë shkak për zhdukjen e djalit të tyre. Nga ana tjetër dyshimet janë se mes 29-vjeçarit dhe nuses së re ka pasur një lidhje , ndërsa paratë kanë qenë të Perlat Myrtajt.
“Mamaja i ka shitur të gjitha që kishte. Laidoni ka pranuar se Perlati i ka dhënë para, për të zhdukur Fatjonin, ata punonin së bashku në Kosovë”, tregon motra e të zhdukurit.
Çfarë thotë policia e Fierit:
Mesditën e së dielës, Policia e Fierit shpërndau një informacion zyrtar, në bazë të të cilit informoi se ishin ndaluar Perlat dhe Ladjon Myrtaj, të dyshuar për zhdukjen e Fatjon Myrtaj.
Policia nuk deklaroi asnjë të dhënë mbi fatin e të zhdukurit.
Sipas të dhënave paraprake, dy të ndaluarit kanë mohuar akuzat e ngritura nga familjarët e Fatjon Myrtaj. Gjithsesi, ngjarja pritet të zbardhet nga hetimet që do të kryen në vijim nga Prokuroria për Krime të Rënda.
