Nga Boldnews.al
Perlat Myrtaj, një prej drejtuesve kryesorë të kompanisë së Policisë Private “Myrto Security” pritet të përballet me prokurorët e Krimeve të Rënda, nën dyshimet se është një prej autorëve të zhdukjes së kushëririt të tij, Fatjon Myrtaj, ngjarje e ndodhur pak ditë më parë në Fier.
Sipas burimeve policore, të afërmit e Fatjon Myrtaj kanë denoncuar në datë 20 Shtator 2019 se familjari i tyre është zhdukur që në datën 17 Shtator dhe nuk dinin asgjë për fatin e tij. Në kallëzimin e tyre, familjarët e Fatjonit kanë ngritur gishtin mbi Perlat Myrtajn, si personi që gjendet pas kësaj ngjarjeje.
“Boldnews.al” raportoi në mënyrë ekskluzive mesditën e së Shtunës se Policia e Fierit kishte ndaluar me iniciativë një zyrtar të “Myrto Security” për një histori rrëmbimi dhe zhdukjeje të një personi.
Mesditën e së dielës, Policia e Fierit shpërndau një informacion zyrtar, në bazë të të cilit informoi se ishin ndaluar Perlat dhe Ladjon Myrtaj, të dyshuar për zhdukjen e Fatjon Myrtaj. Policia nuk deklaroi asnjë të dhënë mbi fatin e të zhdukurit.
Të njëjtat burime policore deklaruan për “Boldnews.al” se ngjarja dyshohet të ketë ndodhur për shkak të një situate familjare, ku është përfshirë edhe bashkëshortja e një prej të ndaluarve.
Sipas të dhënave paraprake, dy të ndaluarit kanë mohuar akuzat e ngritura nga familjarët e Fatjon Myrtaj. Gjithësesi, ngjarja pritet të zbardhet nga hetimet që do të kryen në vijim nga Prokuroria për Krime të Rënda, si prokuroria kompetente për “rrëmbimet”.
