Presidenti Ilir Meta ka reaguar me anë të një postimi në facebook rreth grumbullimit të çeshtjeve gjyqësore, të cilat sipas tij janë bërë pirg për shkak të mosfunksionimit të gjykatës.
Meta shkruan se çështjet e mbartuara në Gjykatën e Lartë janë një shkelje e të drejtave themelore të njeriut për të patur një shqyrtim gjyqësor brenda një afati të arsyeshëm.
“Sot askush nuk mban përgjegjësi publike edhe pse vendi nuk ka ende Gjykatë Kushtetuese, ku dosjet që presin radhën për shqyrtim janë bërë pirg! Reforma u bë për qytetarët dhe funksionimi i sistemit të drejtësisë duhet t’i shërbejë vetëm qytetarëve”, shkruan Meta.
Presidenti bën apel që të merren ‘të gjitha masat që të garantohet sa më shpejt për qytetarët akses i plotë në të gjitha shkallët e gjyqësorit, dhe brenda një afati të arsyeshëm, si dhe të garantohen të drejtat dhe liritë themelore të shtetasve që të mos cënohen nga mosfunksionimi i Gjykatës së Lartë.’
