U rikthye te Fiorentina pas një huazimi 2-vjeçar te Cremonese në Serinë B dhe Gaetano Castrovillit i kanë mjaftuar vetëm 3 takimet e para të Serisë A për të bindur plotësisht teknikun Montella dhe gjithë ambientin e klubit vjollcë për aftësitë e tij.
Mesfushori 22-vjeçar ka treguar një nivel mjaft të lartë teknik dhe angazhim maksimal në të gjitha fazat e lojës, ndërsa pas ndeshjes me Juventusin, Monetella konfirmoi besimin e plotë te Castrovilli, duke thënë se e ka fituar vendin në 11-shen bazë.
Kaq ka mjaftuar që drejtuesit e Fiorentinës të nisin menjëherë nga puna për t’i rinovuar kontratën futbollistit, për t’i përmirësuar pagën aktuale, që është vetëm 200 mijë euro në sezon dhe për t’u mbrojtur nga ndonjë largim i mundshëm.
Ditën e djeshme menaxheri i Castrovillit ka qenë në takim me drejtuesit e klubit, të cilët i kanë propozuar një kontratë deri në vitin 2025, në krahasim me atë aktualen që skadon më 2021-shin dhe një pagë që nis me 1.3 milionë euro në sezon dhe rritet në mënyrë të vazhdueshme çdo vit.
Marrëveshja është pëlqyer nga menaxheri dhe futbollisti, të cilët pritet të vendosin përfundimisht javën e ardhshme dhe më pas të firmosin kontratën e re, që do të rriste të ardhurat e Castrovillit dhe do të qetësonte drejtuesit e Fiores.
