Pas një sërë aludimesh lidhur me ‘heshtjen’ e ndërkombëtarëve sa i përket vendimit që u dha dje për çështjen Tahiri, ka ardhur edhe reagimi i parë nga amerikanët.
Përmes një statusi në facebook,Ambasada Amerikane ka kritikuar drejtësinë duke e cilësuar këtë vendim si ‘shkurajues’. Megjithatë, ajo që vihet re është ‘dashamirësia’ e ndërkombëtarëve në gjithë rrugëtimin e cështjes Tahiri duke mos mbajtur ende një qëndrim konkret. Ambasada e konsideron vendimin ‘demonstrim të pavarësisë në rritje të gjyqësorit’ duke shtuar megjithatë se ai është ‘shkurajues”, një prononcim ky shumë i ngjashëm me linjën e përdorur edhe nga vetë drejtësia ‘edhe me edhe pa faj’.
Statusi i Ambasadës Amerikane
Vendimi i djeshëm kundër ish Ministrit të Brendshëm Saimir Tahiri demonstron pavarësinë në rritje të gjyqësorit dhe fillimin e fundit të pandëshkueshmërisë për personat me lidhje të forta. Ndërkohë që dënimi i zotit Tahiri për akuzën e shpërdorimit të detyrës sinjalizon një hap të rëndësishëm përpara, dënimi është shkurajues, duke pasur parasysh se sa të rënda ishin akuzat. Ata që shpërdorojnë besimin publik dhe shkelin ligjin duhet të përballen me pasoja domethënëse. Shtetet e Bashkuara do të vazhdojnë të mbeten partnerë të Shqipërisë, në mbështetje të përparimit të mëtejshëm të reformës në drejtësi, transparencës dhe qeverisjes së mirë.
