Disa nuk mbajnë përgjegjësi as për vëllezërit e tyre. Kështu mësohet të jetë shprehur ish-ministri i Brendshëm Saimir Tahiri, i cili pret vendimin e Gjykatës së Krimeve të Rënda, pas kërkesës së prokurorisë për dënimin me 12 vjet burg.
Gjatë seancës, Tahiri tha se nuk jam unë shefi i madh, madje as Edi Rama nuk është shefi i madh. Reagimi i Tahirit erdhi lidhur me episodin se Habilajt po hanin drekë me shefin e madh.
“Rama është shefi im i madh në politike, as unë e as Rama nuk jemi shefa në raport me krimin”, mësohet të ketë deklaruar Tahiri përpara togave të zeza.
Gjatë seancës së sotme, gjykata rrëzoi disa nga provat e Tahirit, më konkretisht emaili dërguar prokurorit Dritan Prençi, shkresat e dërguara në drejtim të ish Ministres së Mbrojtjes, Mimi Kodheli dhe regjistri i hyrje daljeve në Ministrinë e Brendshme.
Tahiri akuzohet se ka favorizuar Habilajt, kushërinj të largët të tij, në trafikun e drogës.
Duket se kjo ka qenë arsyeja që Tahiri ka përmendur vëllezërit, pa specifikuar konkretisht se kujt ia drejton mesazhin e koduar.
Ndoshta shigjetat e Tahirit janë në drejtim të Fatmir Xhafajt, pasardhësit të tij në Ministrinë e Brendshme, të cilit iu kërkua dorëheqja pasi vëllai i tij Agron (Geron) Xhafaj, ishte dënuar nga drejtësia italiane për trafik droge.
Por akuza publike ka pasur edhe në drejtim të Olsi Ramës, vëllait të kryeministrit Edi Rama. Veçanërisht akuzat ndaj Olsi Ramës janë bërë nga Partia Demokratike dhe ish-kryeministri Sali Berisha. Ky i fundit ka akuzuar Olsi Ramën se i ka kaluar drogën në kufi me makinën e tij grupit të Xibrakës.
