Ditën e djeshme, emisioni “Stop” publikoi një video ku një pedagog i Universitetit të Elbasanit, shfaqej duke i kërkuar një studenteje favore seksuale në këmbim që t’i jepte asaj provimet.
Në videon e publikuar shfaqet një studente, të cilës nuk i jepet as emri dhe as fytyra, e cila takohet me profesorin e saj Denis Himci.
Ky i fundit i kërkon studentes t’i japë një puthje, si për t’i treguar “që e ka xhan” duke i kërkuar qartazi favore në këmbim të provimeve.
Studentja nuk kishte një apo dy, por një sërë provimesh që donte të merrte brenda një jave dhe ndërsa me Himçin e “kishte zgjidhur muhabetin”, ai do ndërhynte edhe te pedagogët e tjerë për të kaluar studenten.
Madje ai është i gatshëm, që një kolegeje të tij t’i blejë një parfum në këmbim të notës kaluese për studenten.
Pas publikimit të investigimit të “Stop”, pedagogu u vu në pranga nga policia.
“Specialistët për Hetimin e Krimit Ekonomik dhe Financiar në Drejtorinë Vendore të Policisë Elbasan, bënë ndalimin e shtetasit D.H., 36 vjeç, pedagog pranë Universitetit “Aleksandër Xhuvani”, Elbasan, për veprat penale “Ushtrimi i ndikimit të paligjshëm ndaj personave që ushtrojnë funksione publike” dhe “Korrupsioni pasiv i personave që ushtrojnë funksione publike”.
Ndalimi i tij u bë pas transmetimit të pamjeve filmike në emisionin investigativ “Stop “, ku ky shtetas i kërkonte favore seksuale një studenteje në këmbim të dhënies së provimeve.”, ishte njoftimi i policisë.
“Hashtag.al” dje zgjodhi të mos e publikonte këtë investigim për pedagogun, pavarësisht rastit të rëndë, për t’i bërë një lexim të mëtejshëm këtij konteksti kur ndodhi.
Çuditërisht ky investigim ishte i rakorduar me një fushatë që kryeministri Edi Rama kishte lançuar ditët e fundit.
Ai u kërkonte studentëve përmes një postimi në rrjetet sociale, që të spiunojnë pedagogët dhe drejtuesit e universiteteve për të luftuar korrupsionin në sistemin arsimor.
Dhe nëse studentët do e bëjnë këtë, sipas Ramës do të shpërblehen me mospagesën e tarifave dhe do të fitojnë edhe një vit bursë!
Nga ana tjetër, kjo fushatë e kryeministrit Edi Rama dhe ky investigim, përkojnë edhe me nisjen e vitit të ri shkollor dhe kritikat që po i bëhen Ramës lidhur me arsimin dhe rënien e numrit të nxënësve nëpër shkolla.
Edhe në raste të mëparshme emisioni STOP ka rezultuar i koordinuar me fushatat qeveritare dhe sidomos ato të ish-ministrit të Brendshëm, Saimir Tahiri.
Linçimi dhe degjenerimi publik me axhendë politike, i ka kthyer emisionet e vetëquajtura investigative në grupe terrori të organizuar, që më shumë se denoncojnë ndonjë korrupsion apo implikim banal pedagogësh apo zyrtarësh publikë, shfaq aspektin kriminal të kësaj skeme mediatike që shantazhon dhe përdoret njësoj siç përdoren organizatat kriminale nga politika. /Hashtag.al/
