Kreu demokrat Lulzim Basha pritet të reagojë përmes një deklarate nga selia e PD-së, lidhur me letrën e parë që Kryeministri Edi Rama i drejton asaj që e quan opozita jo-parlamentare, për nisjen e dialogut për reformën zgjedhore.
Pas votimeve të 30 qershorit dhe raportit përfundimtar të OSBE/ODIHR, Kryeministri Edi Rama ka vendosur të nisë një letër publike drejtuar kryetarëve të partive opozitare, të cilët i fton të vendosin urat e komunikimit për nisjen e dialogut.
Ftesa vjen në një kohë kur zyrtarë të Rilindjes, përfshi edhe vetë Kryeministrin, të kapur në përgjimet e dosjeve 339 dhe 184, nuk janë përballur me drejtësinë lidhur me manipulimin e zgjedhjeve në të paktën dy qarqe, Dibër dhe Durrës.
Pritet që Basha në deklaratën e tij, të përsërisë qëndrimin e opozitës, për të lejuar drejtësinë të veprojë ndaj zyrtarëve të Rilindjes, që në bashkëpunim me element apo grupe kriminale, tjetërsuan votën e shqiptarëve përmes presioneve, kërcënimeve dhe blerjes.