Kreu demokrat Lulzim Basha i është përgjigjur letrës publike të Kryeministrit Edi Rama, që ftonte partitë e opozitës në vendosjen e dialogut për reformën zgjedhore.
Basha u shpreh në një deklaratë nga selia e PD-së se raporti i OSBE/ODHIR është i qartë.
“Korniza ligjore është e plotë, por mungon vullneti politik, pra nuk është reforma zgjedhore zgjidhja e krizës politike.
Kriza nuk mund të zgjidhet përmes letër-rrufeve. Nuk mund të zgjidhet përmes Damian Gjiknurit që është i kapur në përgjime. Le të ftojnë pastaj edhe Bajrat, Shullazë, Babanët etj. Kjo është një tallje politike.
Duhet të krijohen mekanizmat që kurrë më një njeri i vetëm ta shndërrojë Shqipërinë në këtë mënyrë.
Reforma zgjedhore ka rëndësinë e saj.. Letrat e hapura, provokime të tilla tregojnë mungesën e këtij vullneti politik.
Së pari duhet pranimi i situatës në vend dhe largimi nga krimi i organizuar. Një reformë zgjedhore të plotë dhe një reformë të thellë politike, që do ta kthejë politikanin në shërbëtor të popullit.
Ne i kemi dhënë një përgjigje përfaqësuesve ndërkombëtar dhe fatkeqësisht një përgjigje negative ka dhënë Edi Rama që ka thënë se do të përgjigjet pas zgjedhjeve të 30 Qershorit.
Pres nga OSBE në Tiranë të shprehet për tre kryebashkiakët, për raportin final të OSBE/ODHIR-it, të cilat nuk kanë ardhur ende”, tha Basha.
