Mbrëmjen e djeshme, kreu i opozitës Lulzim Basha mblodhi aleatët e tij në një darkë informale në një restorant në qytetin e Durrësit.
Burime thanë se ata diskutuan sesi do të vazhdojë aksioni opozitar ku morën disa vendime. (Lexo këtu)
Pas këtij takimi ka ardhur dhe një qëndrim zyrtar nga radhët e LSI-së ku nënkryetari Petrit Vasili ka deklaruar se opozita e bashkuar do të intensifikojë aksionin shumëplanësh.
Ai ka deklaruar se ka një dakordësi të plotë për një platformë që zgjidh krizën e rëndë kushtetuese, politike dhe përfaqësimi.
“Opozita e bashkuar është e vetmja garanci për daljen nga kriza. Opozita kërkon hapjen e negociatave dhe jo demagogjinë e radhës”, mësohet se ka deklaruar Vasili.
Më tej Vasili ka deklaruar se opozita është e vendosur për të çuar deri në fund aksionin e saj.
“Edi Rama është gjeneruesi dhe shkaku i krizës dhe jo zgjidhja. Interesi i tij i vetëm është që integrimi të dështojë. Mazhorancës i intereson kriza si alibi për grabitjen e koncesioneve”, është shprehur Petrit Vasili.