“Gjykata e Janinës konfirmoi të gjithë denoncimet e Partisë Demokratike se Agim Kajmaku ishte në kërkim nga drejtësia greke, pasi është arrestuar në Janar 2003 me emrin Jorgo Toto dhe ai e kishte fshehur këtë fakt në formularin e dekriminalizimit”. Kështu shprehet sekretari i përgjithshëm i PD-së Gazmend Bardhi, i cili publikon një dokument që mban vulën e gjykatës dhe datën 13/09/2019.
“Seancat gjyqësore për Jorgo Toton e Bashkisë së Vorës, të zhvilluara në Janinë për 4 ditë, u japin fund zvarritjeve të prokurorisë për zbulimin e identitetit të kandidatit të Edi Ramës. Megjithëse i dha kohë të sigurojë që nuk futet në burg në Greqi duke mbyllur çëshjtjen atje, Agim Kajmaku ka punë me ligjin shqiptar. Vendimi konfirmon se Agim Kajmaku alias Jorgo Toto ka qenë me proces penal të hapur në Greqi dhe me urdhër arresti në fuqi, ashtu sikurse Partia Demokratike denoncoi. Vendimi konfirmon se Agim Kajmakut, alias Jorgo Toto, nuk i lejohej nga ligji i dekriminalizimit të kandidonte për kryetar bashkie. Vendimi konfirmon se Agim Kajmaku, alias Jorgo Toto ka gënjyer në Formularin e Dekriminalzimit, duke kryer veprën penale të fallsifikimit të dokumenteve. Agim Kajmaku ka fshehur arrestimin në Greqi me emrin Jorgo Toto. Për këtë duhet të shkarkohet nga detyra dhe t’i vihen menjeherë prangat për shkeljen flagrante të ligjit të dekriminalizimit dhe mashtrimin e qytetarëve shqiptarë”, sqaron Bardhi në një postim në Facebook.
Dokumenti
Dokumenti provon se Jorgo Toto ka qenë në kërkim nga drejtësia greke dhe gjyqi është zhvilluar përgjatë katër ditëve këtë muaj, duke u shpallur i pafajshëm për akuzat. Edhe pse është shpallur i pafajshëm nga Gjykata e Janinës, Kajmaku pritet të ‘digjet’ nga ligji i dekriminalizimit, pasi ka gënjyer në formularin e vetëdeklarimit, duke fshehur arrestimin me emrin Jorgo Toto.
Ndërkohë, vetë Kajmaku, ka mohuar që të ketë qenë i pandehur apo i arrestuar në Greqi, që pas akuzave fillestare të Partisë Demokratike për këtë çështje.