“La Republique en Marche”, partia e presidentit francez, Emmanuel Macron, është treguar sërish kritike për numrin e lartë të kërkesave për azil në vend.
Zëdhënësja e kësaj partie, Aurore Berge, mbështeti pikëpamjet e presidentit Macron, për një linjë “qëndrueshmërie”, por “me humanizëm” për emigracionin, duke paralajmëruar edhe rrezikun nga keqpërdorimi i së drejtës për azil.
Shifrat e Eurostat tregojnë se kërkesat për azil të shtetasve shqiptarë në Francë arritën në 5305 në gjashtëmujorin e parë të vitit 2019, duke kryesuar listat kombëtare.
“Nëse duam që e drejta për azil të vazhdojë të ketë kuptim, nuk mund të lejojmë që ajo të devijohet, dhe që Franca të kthehet në një vend të parë për azilkërkues nga Shqipëria apo Gjeorgjia, për shembull, pasi është e qartë se këto nuk janë kërkesa karakteristike dhe legjitime për azil,” shprehet Berge.
Tema për emigracionin do të debatohet në parlamentin francez në datat 30 shtator dhe 2 tetor.
Deklarata e saj pasoi atë të kryeshtetarit Macron një ditë më parë, kur para deputetëve të mazhorancës, aleatëve dhe senatorëve tha se çështja e emigracionit duhet trajtuar me guxim dhe duhet parë interesi i përgjithshëm.
Shqipëria konsiderohet ligjërisht si një vend i sigurt nga shtetet europiane, ndaj shumë kërkesa për azil apo emigracion të parregullt refuzohen vazhdimisht.
