Sekretari i Përgjithshëm i Partisë Demokratikë, Gazmend Bardhi shprehet se opozita është e gatshme të futet në zgjedhje në çdo datë, mjafton që të jenë me standarde.
Nëse standardet do të plotësohen, tha Bardhi në një intervistë televizive, opozita futet në zgjedhje edhe në 13 tetor, datë e dekretuar nga Presidenti Ilir Meta për zgjedhjet e ardhshme lokale.
“Ne s’kemi thënë do futemi ose jo në zgjedhjet e 13 tetorit. Nëse standartet do ishin përmbushur për ne është datë kushtetuese, ligjërisht në përputhje me dekretin e Presidentit, do duhet të zhvilloheshin atëherë. I gjithë qëndrimi ynë që në 30 qershor s’ka zgjedhje ka qenë para se të shfuqizonte datën Presidenti. Kur e shfuqizoi s’kishim asnjë arsye pse të bllokonim votimet brenda PS. Por, zgjedhje të ligjshme të dekretuara nga Presidenti për organet e qeverisjes vendore s’kanë ndodhur”, tha ai.
Bardhi mohoi të ketë një marrëveshje të fshehtë Rama-Basha, siç është përfolurës fundmi. “Shqipëria s’ka nevojë për një pazar që zgjidh një krizë momentale. Një zgjidhje afatgjatë dhe që të jetë e tillë duhet të bazohet në parime e standarde, kjo ka qenë kërkesa e opozitës. Njeriu që është shkaktar i kësaj situate s’është ofruar për të marrë përsipër një zgjidhje. Ne kemi ofruar zgjidhje. Kemi kërkuar që prokuroria të dënojë ata që kanë vjedhur zgjedhjet e kaluara”, tha.
