Pesë persona janë qëlluar për vdekje në një lokal pranë shtëpisë së Presidentit Meksikan Andres Manuel Lopez Obrador, disa orë para se ai të niste festimet për ditën e pavarësisë të dielën natën.
Ministria e Sigurisë Publike tha se pesë persona u vranë dhe tre u plagosën, kur një grup personash të armatosur, hapën zjarr në lokal. Ngjarja solli në kujtesë për meksikanët problemet kronike të sigurisë me të cilat përballet Lopez Obrador, një i majtë veteran i cili mori presidencën në dhjetor duke u zotuar të ulte nivelet e larta të dhunës në Meksikë.
Mirëpo që atëherë, siç shkruan “Reuters” gjakderdhja ka vazhduar dhe raporti i vrasjeve për vitin 2019 po tejkalon rekordin e përgjithshëm të vitit të kaluar. Mediat meksikane raportuan se sulmi në lokalin në Tabasco ndodhi rreth orës 8 të darkës.
