Policia në Hong Kong ka përdorur ujë me presion dhe gaz lotsjellës për të shpërndarë protestuesit që i sulmonin forcat e sigurisë me molotov dhe tulla.
Përleshja mes dy palëve ndodhi afër zyrave qeveritare të rajonit me autonomi të pjesshme nga Kina.
Dhuna shpërtheu pasi mijëra protestues anti-qeveritarë i mbushën rrugët në kundërshtim me vendimin e policisë për ndalimin e tubimeve publike.
Në pjesën e parë të ditës së diel, qindra protestues ishin mbledhur para Konsullatës Britanike, duke kërkuar nga Britania e Madhe që t’i bëjë presion Kinës për t’i respektuar të drejtat e garantuara sipas marrëveshjes së vitit 1997 për tranzicionin e pushtetit.
Protestat masive nisën para 15 javësh për shkak të një projektligji për ekstradim, me të cilin qytetarët e dyshuar për krime do të mund të ekstradoheshin në Kinë. Qeveria tashmë e ka tërhequr këtë projektligj, por protestuesit kanë shtuar kërkesa të tjera.
Për javën e dytë me radhë, disa protestues mbanin në duar edhe flamuj të Shteteve të Bashkuara dhe bënin thirrje që presidenti Donald Trump ta çliroj Hong Kongun.
Protestuesit i vunë flakën një kamioni të policisë përmes një bombe me benzinë, ndërsa policia i lagu protestuesit me ujë me ngjyrë të kaltër, i cili shërben për t’i identifikuar ato më vonë, shkruan “BBC”
