Gramoz Ruçi, ish-ministri i Brendshëm i diktaturës, sot Kryetar i Kuvendit të Shqipërisë, jep leksione për demokracinë.
Në ditën ndërkombëtare të demokracisë, Ruçi thekson se demokracia liberale është forma kryesore e demokracisë në kohën e sotme.
“Demokracia liberale është në rradhë të parë e mbi të gjitha demokraci kushtetuese. Kushtetuta është garanti i demokracisë dhe Kuvendi i Shqipërisë është i vendosur deri në fund dhe pa asnjë kompromis për mbrojtjen e Kushtetutës.
Kuvendi është një institucion kyç i demokracisë dhe mbështetet në veprimtarinë e tij parlamentare ligjbërëse e kontrolluese në parimin universal të Magna Carta se demokracia mund të realizohet si demokraci nën ligj”, shkruan Ruçi në mesazhin e tij.
Ruçi u zgjodh në krye të Parlamentit pas zgjedhjeve të 25 qershorit 2017. Nën drejtimin e tij, Kuvendi është kthyer në një noter të akteve dhe nismave të qeverisë, përfshi këtu edhe miratimit të një ligji të posaçëm që favorizonte kompaninë Fusha shpk për ndërtimin e godinës së re të Teatrit Kombëtar, dhe disa kullave në zonën ku sot ndodhet teatri.
Po kështu, Kuvendi i drejtuar nga Ruçi, do të hyjë në historinë e parlamentarizmit shqiptar, për ngritjen e Komisionit Hetimor që kërkon shkarkimin e Ilir Metës nga posti i Presidentit, por edhe për krijimin e kushteve që çuan opozitën në djegien e mandateve.
Dhe po kështu, Kuvendi i drejtuar nga Gramoz Ruçi, do të mbahet mend për faktin se pranoi rrëzimin e dekretit presidencial për anullimin e mbajtjes së zgjedhjeve më 30 qershor, nga KQZ, e cila mori rolin e Gjykatës Kushtetuese, gjë që evidentohet edhe në raportin e fundit të OSBE/ODIHR.
