“Ne jemi pa Gjykatë Kushtetuese, pasi për fat të keq, Kryeministri Edi Rama sabotoi në 2017, ngritjen dhe funksionimin e KED-së, që rankonte emrat e kandidatëve për Gjykatën Kushtetuese.
Në 2018, kur isha President, ftova edhe përfaqësuesen e BE-së në Tiranë, ambasadoren Vlahutin, për hedhjen e shortit dhe ajo nuk erdhi, madje mund të them se BE duhet të hetojë për këtë rast.
Në të dy rastet Edi Ramës nuk i pëlqyen emrat që dolën si kandidatë. Ndërsa Vlahutin, u tregua e papërgjegjshme”.
Kështu u shpreh në studion e Syri-t, Presidenti Ilir Meta, duke akuzuar mazhorancën se ka shkelur të gjitha afatet për ngritjen e institucioneve të drejtësisë së re.
Meta theksoi se Vlahutin, në kohën që ishte Ambasadore e BE-së, shmangte praninë e saj në hedhjen e shortit të anëtarëve, pasi priste vlerësimet e Edi Ramës për kandidatët, dhe kjo ishte papërgjegjshmëri.
“Pse e do më shumë Edi Rama, Ulsiu apo ndonjë tjetër reformën në drejtësi, ndërsa unë nuk e dua?
Ilir Meta është me reformën në drejtësi, me atë reformë që u bë me 140 vota. Se si po zbatohet kjo reformë, ju shikojeni, a ka ndonjë vlerësim lidhur me këtë proces?
Opozita ka përgjegjësinë e saj për kapjen e reformës në drejtësi, sepse lejoi kapjen”, tha Meta.
