Gazetari Telnis Skuqi akuzoi disa ditë më parë kryetarin e Bashkisë Gjirokastër se ka patur probleme me përfundimin e shkollës së mesme. Ai thoshte se Golemi ka deklaruar dy vite të ndryshme për fillimin dhe mbarimin e arsimit të mesëm.
Në CV e tij të publikuar në faqen zyrtare të Kuvendit të Shqipërisë, Golemi thotë se gjimnazin e Fierit e ka nisur dhe përfunduar nga viti 1992 deri në 1996, ndërsa në deklaratën e tij zyrtare të paraqitur sipas «Ligjit të dekriminalizimit» përmendte vitet 1990-1994.
Ndërkohë që përgjigjia ka ardhur nga Golemi, i cili ka shpërndarë në mediat lokale dokumentet e diplomës së shkollës së mesme dhe asaj të lartë. Në dy diplomat shihet se Golemi ka përfunduar gjimnazin në Fier, por nuk saktësohet data ku kryebashkiaku ka përfunduar mësimin. Gjithashtu, bie në sy edhe nota 6 e tij në lëndën e Gjuhës së Huaj.
