Agim Kajmaku, kryebashkiaku i Vorës i dalë nga votimet e 30 qershorit, ka dorëzuar në polici shenjat e gishtave.
Për Kajmakun, janë publikuar dokumente nga Partia Demokratike që pretendojnë se nën emrin Jorgo Toto, ka marrë një masë arresti me burg dhe më pas është arratisur nga shteti helen për ti shpëtuar drejtësisë. Vetë Kajmaku ka përgënjeshtruar akuzat.
PD i është drejtuar me një kërkesë zyrtare Prokurorisë që të nisë hetimet për Kajmakun. Ka pasur një përplasje mes PD dhe Prokurorisë për mos marrjen e shenjave të gishtave të Kajmakut nga organi i akuzës. Në një njoftim zyrtar, Prokuroria deklaronte se i është dërguar një kërkesë Kajmakut në 26 Gusht ku i kërkohet atij të dorëzojë gjurmët e gishtërinjve duke shtuar se kjo shkresë nuk ka mbërritur ende në adresë për shkak se shërbimi postar ka ngatërruar adresë. Por Posta, në një përgjigje ndaj deklaratës së Prokurorisë, e përgënjeshtroi duke deklaruar se letra e prokurorisë është dorëzuar më 29 Gusht pranë Bashkisë Vorë, brenda afateve të përcaktuara.
Gjurmët e gishtave të Agim Kajmakut do të krahasohen me ato që do të vijnë nga Greqia. Në një njoftim të pak ditëve më parë, Prokuroria e Përgjithshme u shpreh: “Jemi në pritje të përgjigjes nga autoritetet greke të drejtësisë dhe atyre policore, të cilat janë vendimtare për marrjen e një vendimi.”
