Presidenti Donald Trump ka larguar John Bolton nga detyra e Këshilltarit për Sigurinë Kombëtare.
“Unë e njoftova John Bolton mbrëmë se shërbimet e tij nuk janë më të nevojshme në Shtëpinë e Bardhë. Unë nuk u pajtova me shumë sugjerime të tij, dhe për këtë arsye i kërkova John dorëheqjen e tij, të cilën m’a dha mua këtë mëngjes. Falënderoj shumë Johnin për shërbimin e tij. Unë do të emëroj një Këshilltar të ri të Sigurisë Kombëtare javën e ardhshme “, njoftoi Presidenti Trump.
Prej kohësh, Bolton ishte anashkaluar nga Presidenti Trump, ndërsa shprehu mospajtim me përpjekjet e Presidentit për të siguruar një fund të luftës në Afganistan.
Bolton, i cili ka mbrojtur prej kohësh një prani të gjerë ushtarake në të gjithë botën, është bërë një armik i brendshëm i fortë i një marrëveshje paqeje në zhvillim që synon t’i japë fund luftës më të gjatë të Amerikës, thanë zyrtarët, shkruante Washington Post.
Kundërshtimi i tij ndaj përpjekjes diplomatike në Afganistan ka irrituar Presidentin Trump, thanë këta zyrtarë.
Qëndrimi i Boltonit ngriti pikëpyetje në lidhje me ndikimin e tij mbi administratën që po kërkonte tërheqjen e trupave nga Afganistani, si dhe një marrëveshje ambicioze bërthamore me Korenë e Veriut dhe angazhimin e mundshëm me Presidentin iranian Hassan Rouhani.
Bolton, thanë zyrtarët e SH.B.A.-së, qëndron në kundërshtim me këto përpjekje.
Bolton ishte ndër zyrtarët e lartë të administratës së Presidentit Trump që foli publikisht mbi shkëmbimet territoriale mes Serbisë dhe Kosovës.
“Politika jonë, politika e Shteteve të Bashkuara është që nëse të dyja palët arrijnë marrëveshje, ne nuk e përjashtojmë rregullimin territorial. Qartazi është një çështje e vështirë. Nëse nuk do të ishte, do të ishte zgjidhur shumë kohë më parë. Por ne nuk do të bëhemi pengesë dhe nuk mendoj se ndokush në Evropë do të bëhet pengesë nëse të dyja palët arrijnë një marrëveshje të ndërsjellë e të kënaqshme”, tha Bolton, gjatë një vizite në Kiev, rreth 1 vit më parë.
