Peter Zingraf, ambasadori i Gjermanisë në Tiranë, ka zhvilluar një takim me bashkëkryetarin socialist të Komisionit të Reformës Zgjedhore, Damian Gjiknuri.
Njoftimi është bërë nga deputeti socialist, sipas të cilit diplomati gjerman, ka riktheksuar interesimin maksimal të Gjermanisë për reformën zgjedhore.
Pas takimit mes Ambasadorit gjerman dhe bashkëkryetarit të Komisionit të Reformës Zgjedhore, një tjetër diplomat, ai i OSBE-së, Robert Borchardt ka vizituar Kuvendin e Shqipërisë.
Mendohet se edhe takimet e Kreut të Prezencës së OSBE-së në Tiranë, do të kenë në qendër të vëmendjes reformën zgjedhore.
Postimi i Gjiknurit
Me ambasadorin Peter Zingraf, i cili ritheksoi interesimin maksimal të Gjermanisë për reformën zgjedhore.
Diskutuam mbi ecurinë e deritanishme të këtij procesi, gatishmërinë e mazhorancës për të krijuar hapësirat e bashkëpunimit për opozitën parlamentare ashtu edhe atë joparlamentare.
Në kuadër të adresimit të kërkesave të opozitës parlamentare, me bashkëkryetaren e komisionit zj.Rudina Hajdari jemi dakordësuar të organizojmë brenda Shtatorit një tryezë gjithëpërfshirëse diskutimi mbi çështjet e sistemit zgjedhor.
