Paolo Gentiloni do të jetë Komisioneri Evropian për Çështjet Ekonomike dhe Monetare. Kjo u njoftua nga Presidentja e zgjedhur e Komisionit Evropian, Ursula von der Leyen, e cila prezantoi ekipin e saj në Bruksel.
Gentiloni është i pari italian që do të mbajë këtë post.
Por, drejtuesja e ‘Vëllezërve Italianë’, gazetarja dhe politikania Giorgia Meloni ka hedhur akuza në lidhje me përzgjedhjen e tij.
Meloni shkruan në faqen e saj në rrjet se Gentiloni është njeriu perfekt për të mos ndryshuar asgjë në Evropë, për të mbrojtur interesat e financës spekulative e për të forcuar hegjemoninë franko-gjermane.
“Si patriotë, jemi të lumtur që Italisë i është dhënë në Komisionin Evropian një portofol i rëndësishëm si ai i Çështjeve Ekonomike e Monetare.
Për të ardhur keq që i ngarkuar për një detyrë të tillë është thirrur një politikan që italianët e kanë refuzuar, e kanë dërguar në shtëpi dhe që Lëvizja 5 Yje e bëri të hyri nga dritarja falë paktit të kolltukut me PD.
Gentiloni është njeriu perfekt për të mos ndryshuar asgjë në Evropë, për të mbrojtur interesat e financës spekulative e për të forcuar hegjemoninë franko-gjermane’, shkruan Giordia Meloni, duke publikuar edhe një foto të Paolo Gentilionit me Xhorxh Soros.
