Ditën e sotme numërohet hera e 15 që seanca gjyqsore ndaj Emiliano Shullazit është shtyre sërisht. Shkak për shtyrjen e 15-të të seancës është bërë mungesa e dy avokatëve, Vladimir Meçe dhe Elton Domi.
Burime bëjnë me dije se avokatët kanë përcjellë në gjykatë arsyen e mungesës, që sipas tyre është shëndetësore. Kjo ka bërë që trupa gjykuese t’i kërkojë të pandehurit Endrit Zela, të ndërrojë avokat.
Grupi ‘Shullazi’, është dënuar më 13 nëntor 2018, me 55 vite burg nga Gjykata e Shkallës së Parë për Krimet e Rënda. Vendimi është apeluar nga grupi, ndërsa koka e bandës, Emiljano Shullazi është dënuar për gjobëvënie ndaj dy biznesmenëve, Ylvi Beqja në të famshmen çështje të “Hotel Vollgës” dhe Jani Zakos, me 14 vite burg.
Për katër anëtarët e tjerë të grupit, Gjykata ka dhënë 12 vite burg për Gilmando Danin, Indrit Qyqja 10 vite, Indrit Zela 10 vite dhe Blerim Shullazi 9 vite burg. Në vendimin e Gjykatës theksohej se askush nga të dënuarit nuk do të përfitojë liri me kusht.
Dy akuzat e tjera, shkatërrim prone me eksploziv dhe kanosje ndaj dy pedagogëve Mynyr Koni dhe Dhori Kule kanë rënë. Seanca e radhës u caktua më 23 shtator në 11:00.
