Nga Boldnews.al
Rilindasit ishin mprehur: “Ja se do e shohë presidenti kur të shkojë para Komisionit Hetimor Parlamentar, qepaze do e bëjë Manja dhe anëtarët e tjerë…”. Çuditërisht kjo nuk ndodhi, madje ngjau e kundërta. Kreu i shtetit Ilir Meta për të mos humbur protagonizmin politik, jo vetëm nuk e refuzoi thirrjen në këtë komision të ngritur për shkarkimin e tij, por kishte një dëshirë që ai të vijonte sa më gjatë.
I dha përgjigje çdo pyetje të ngritur, nga anëtarë socialistë apo të vëtëshpallurit opozitarë. Ishte e kuptueshme që kreu i shtetit do e merrte disi protagonizmin për të dhënë shpjegime se përse zhdekretoi 30 qershorin si datë zgjedhjesh lokale dhe vendosi 13 tetorin. Kreu i shtetit shpesh artikulohej: “vendimi im ishte në të mirë të vendit dhe kam mbajtur qëndrim mbi palët politike”.
Pjesa tjetër zhgënjeu pritshmëritë e Rilindasve. Kryetari i Komisionit Hetimor Parlamentar Ulsi Manja kishte një lloj kompleksiteti teksa i drejtohej kreut të shtetit. Nuk mbajti qëndrime fort militante, por bëri disa pyetje dhe në fund përsëriti pesë herë shprehjen: “Faleminderit zoti President”. Të jetë kjo një tërheqje e butë nga nisma për shkarkimin e e Ilir Metës? Nuk duket aspak kështu.
Para Manjës dhe “Manjave” të tjerë, mbetet qëndrimi i kryeministrit Edi Rama. Ai padyshim që do donte në kuptimin më të plotë të fjalës që Ilir Metën ta hiqte qafe politikisht, qoftë edhe nëpërmjet këtij komisioni qesharak. Ky komision nuk bëri dot shfaqje spektakolare që mund të vinin në vështirësi kreun e shtetit. I ngjanin personazheve publik të “kastruar” në moral, por ishin aty për të treguar formalisht potencën dhe të fshihnin sa të mundnin inpotencën e dukshme.
Diçka ka ndryshuar dhe faktikisht socialistët po bëjnë një lojë të kuptueshme, por nëse u ecën mbarë, do e kapërcejnë edhe një herë lumin e vrullshëm që ka ardhur. Thelbi për shkarkimin e Metës lidhet pikërisht data 30 qershor ku socialistët morën pa garë 61 bashkitë e vendit. Reprezalja dhe deliri kapi majat kur Rilindja hodhi në treg idenë se këto zgjedhje ishin njohur nga ndërkombëtarët, që u sugjeruan nga fatorë madhorë me ndikim deri në Uashington, por lëvizjet e fundit të personaliteteve të huaja rrëzojnë këtë mit të shitur nga qeveria.
30 Qershori ka rënë në të gjithë aspektet moralisht dhe ligjërisht. Raporti i OSBE/ODIHR renditi një mori shkeljesh të rënda të të gjithë procesit. Gjithashtu përfaqësues të CDU-CSU-së gjermane i kanë përfshirë votimet e 30 qershorit në “kushtet” që mund ti vendosen Shqipërisë për hapjen e negociatave.
Ama kreut të qeverisë i ka shkarë këmba edhe në aspektin moral e ligjor brenda oazit të tij. Dy kryebashkiakë tashmë konsiderohen të rrëzuar, Valdrin Pjetri i Shkodrës as edhe një ditë nuk e gëzoi postin në krye të bashkisë, pasi iu zbulua një dënim i marrë në Itali për mbajtje dhe trafikim të lëndëve narkotike. Gjithashtu edhe kryebashkiaku i Vorës Agim Kajmaku me gjasë do ketë të njëtin fat, pavarësisht tentativës së prokurorisë për ta zgjatur sa më shumë vendimin. Ai u denoncua nga PD se është proceduar penalisht në Greqi për mbajtje dhe përdorim të kartëmonedhave të falsifikuara. Më shumë mundësi, ashtu sikurse është paralajmëruar, një tjetër kryebashkiak i Rilindjes do dalë zbuluar kur mund ti publikohet e shkuara kriminale.
I ndodhur në kushte të tilla, Rama nuk di mënyrë tjetër të qeverisuri përveçse me personazhe me të shkuar dhe të tashme të errët, që në të kaluarën e tyre si “çuna problematik” kanë kaluar një herë nga burgjet e botës apo ato të vendit.
Rama vërtetë e thirri Metën në Komisionin Hetimor Parlamentar në përbërje të së cilit janë individë qesharak, pa bosht politik apo personal, por vetë do ketë një tjetër përballje. Në Berlin ai pritet që të gjendet para deputetëve të CDU-CSU-së të cilët si objekt diskutimi veç të tjerash kanë edhe çështjen e zgjedhjeve të 30 qershorit.
Vetë Rama në situatë të tillë, ku tre bashkia i kanë rënë apo do i bien për shkak të ligjit të dekriminalizimit dhe kur faktori ndërkombëtar e ka bërë të qartë se zgjedhje njëpartiake nuk mund të certifikohen, kërkon të mbyllë kapitullin e atyre zgjedhjeve me sa më pak kosto personale. Ky është edhe thelbi i Komisionit Hetimor Parlamentar që ditën e sotme e konfirmoi se janë të kastruar për dëshirat e liderit të tyre. Herë urdhërohet për tu treguar potent e herë thirren në “klinikën e pushtetit” për tu kastruar me qëllim të jenë sa më pak “agresiv”…!
