Presidenti Ilir Meta deklaroi para Komisionit Hetimor Parlamentar se votimet e 30 Qershorit vendosi t’i shtynte, ndër të tjera, edhe për shkak të një informacioni mbërritur në zyrën e tij, i cili referonte se mund të cënohej siguria kombëtare.
Meta deklaroi se në zyrën e tij mbërriti një informacion sekret, në datë 8 Qershor 2019, në bazë të të cilit krijoheshin dyshime të forta se vendi mund të bëhej objekt i një situate të rëndë, e rëndësisë së tillë që nuk mund të menaxhohej nga Policia e Shtetit. Presidenti deklaroi se, në cilësinë e Kryetarit të Këshillit të Sigurisë Kombëtare, vendosi të evitonte pasojat e një ngjarje të rëndë.
“Presidenti për shkak të detyrës së tij ka pasur informacione të mjaftueshme si në rrugë zyrtare dhe shtetërore, edhe përmes burimeve të tjera për përpjekje për të organizuar akte destabilizimi në vend. Në mënyrë të vecantë në datën 7 qershor një ditë para se presidenti të bënte publik vendimin për shfuqizimin e datës 30 qershor ka marrë një informacion që është sekret dhe i klasifikuar, nëse komisioni do të njihet mund të ndodhë, pasi të merrej leja dhe te verifikohen certifikatat e sigurisë të anëtarëve të komisionit. Me pak fjalë, ky informacion bënte të qartë që persona të caktuar do të përpiqeshin të shfrytëzonin mitingun e opozitës më 8 qershor, edhe për djegien e kuvendit të Shqipërisë”, tha Meta.
Me tej, presidenti sqaroi: “Ky ishte informacion i besueshëm, po të kishe parasysh pasojat nga këto protesta e konfrontime, i keni parasysh deklarartat e ministrisë së brendshme për shumë policë të plagosur, duke e kombinuar këtë informacion mora ate vendim. Një ngjarje e cila mund të prodhonte pasoja për jetën e qytetarëve dhe shkatërrim të imazhit të vendit tonë që me aq ngjarje që ishin bërë deri në atë moment ishte shkatërruar. Historia e vendit tonë për fat të keq nga 2 prilli e deri në 21 janar është plot me ngjarje të tilla të hidhura ku përmes protestave e gjatë protestave kemi pasur viktima dhe isha i bindur se ishte detyra ime që të bëja gjithcka që në datën 8 qershor të evitohej në mënyrë të padiskutueshme një ngjarje e tillë e të krijoja mundësi për një dritare e reflektim midis palëve sikurse e thotë edhe qartë raporti i OSBE-ODIHR pra gjithcka ishte antagonizëm i përbashkët i dy palëve që dëmtonte dhe cënonte integritetin e zgjedhjeve në Shqipëri. Antagonizëm do të thotë armiqësi, kështu që në këto kushte, kjo do të ishte një goditje shumë e fortë jo thjesht për zgjedhjet e 30 qershorit, por kthim i madh mbrapa per vendin. Të dyja palët kishin dhënë shembull të shkëlqyer për të ecur përpara në rrugën e konfliktit pa marre pergjegjesite e asaj qe mund te ndodhte. Jam i detyruar të shoh interesin kombëtar të vendit si president”.
Argumentat/ Meta: Ku bazohet vendimi për shtyrjen e zgjedhjeve
Presidenti Ilir Meta u shpreh gjithashtu se me dekretin e tij për shtyrjen e datës së zgjedhjeve mbrojti të drejtën e zgjedhjes.
“Për sa i takon respektimit të të drejtës së të zgjedhurit s’ka shumë hapësira për të bërë interpretime se çdo të thotë të zgjedhësh, të gjithë e dallojnë ndryshimin mes votimit dhe zgjedhjes”, tha kreu i shtetit. “Kam mbrojtur të drejtën e zgjedhjes së qytetarëve shqiptarë dhe ka, shmangur një proces jo demokratik të votimit me një kandidat për sa i takon të drejtës së zgjedhjes”, tha kreu i shtetit.
Meta, tha se veç Kushtetutës së Shqipërisë, është bazuar edhe në Gjykatën Ndërkombëtare të të Drejtave të Njeriut, dhe në marrëveshjen e stabilizimin asocimit për vendimet e tij për të anuluar zgjedhjet e 30 qershorit. Para komisionit hetimor për dekretet e tij, Presidenti tha se detyra e tij është të garantojë detyrimet ndërkombëtare të Republikës së Shqipërisë. Duke thënë se në themel të kushtetutës është pluralizmi politik, ai tha se qytetarëve u duhej bërë e qartë dallimi mes votimeve dhe zgjedhjeve të lira dhe të ndershme.
“Presidenti e ka për detyrë më shumë sesa vetë qeveria që të garantojë detyrimet ndërkombëtare të Republikës së Shqipërisë, për këtë arsye mandati i presidentit është 5-vjeçar ndërsa i qeverise 4-vjeçar, që të garantojë vazhdimësinë e detyrimeve ndërkombëtare. Përpara këtij parimi kushtetues çdo lloj afati është tërësisht sekondar, ndërsa parësore është mbrojtja e të drejtës për zgjedhjeve. Askush më shumë se gjykata evropiane e të drejtave të njeriut, nuk mund ta sqarojë më qartë këtë të drejtë të zgjedhjes”, tha Meta.
Një tjetër motiv për të anuluar zgjedhjet e 30 qershorit dhe për zgjedhjen e datës së re, sipas Presidentit, ishte integrimi i Shqipërisë. Ai tha se 13 tetori ishte data më e përshtatshme për të mbajtur zgjedhje të qeta dhe me pjesëmarrje të të gjitha forcave politike. “Ishte data më e afërt në respekt të kushtetutës, të ligjeve në fuqi përpara 17-18 tetorit për celjen ose jo të negociatave në BE, për të garantuar një proces të qetë me të gjithë aktorët”, tha Meta.
Meta është thirrur për të dëshmuar në komisionin parlamentar këtë të hënë për të shpjeguar vendimin e tij për shtyrjen e zgjedhjeve lokale. Kujtojmë se komisioni parlamentar për shkarkimin e Metës është ngritur, pasi sipas mahzorancës, ai ka shkelur Kushtetutën me vendimin për shtyrjen e zgjedhjeve.