Presidenti Ilir Meta deklaroi sot para Komisionit Hetimor parlamentar se në datën 8 qershor, ditën kur opozita do të zhvillonte mitingun e rradhës kundër Kryeministrit Edi Rama, do të digjej godina e Parlamentit.
“Presidenti i Republikës, për shkak të detyrës së tij ka pasur informacione të mjaftueshme, për përpjekje për të organizuar akte destabilizimi në vend. Në mënyrë të veçantë, në datën 7 Qershor, një ditë para se Presidenti të bënte publik shfuqizimin e datës 30 Qershor, ka marrë një informacion, sekret dhe të klasifikuar, në rast se komisioni dëshiron të njihet me të mund të ndodhë pasi të marrim edhe konfirmimin nga institucioni. Ky informacion bënte të qartë se persona të caktuar do të shfrytëzonin mitingun e paralajmëruar nga opozita, mes të tjerave, edhe për djegien e Kuvendit të Shqipërisë”, tha Meta.
Deklarata e Presidentit, u pasua disa orë më pas me një reagim nga Gazment Bardhi, Sekretari i Përgjithëm i PD-së, i cili tha se opozita e bashkuar s’ka pasur kurrë në plan të djegë institucionet.
“Partia Demokratike dhe opozita e bashkuar nuk ka pasur kurrë asnjë plan për djegien e institucioneve, pavarësisht se ato nuk përfaqësojnë interesin publik, por interesin e një grupi oligarkësh dhe kriminelësh të lidhur me kryeministrin e vendit”, tha Bardhi.
Por nënkryetari i LSI-së, Petrit Vasili, nga studion e News 24, ka konfirmuar deklaratat e Metës. Vasili flet për një grup të dyshimtë personash që nuk dihej se kujt i përkisnin.
“Veprimi i Presidentit ishte shumë i matur. Bëhej fjalë për gjëra shumë të rënda, siç mund të ishte dhe djegia e Parlamentit. Isha bashkë me Bardhin, kur pamë një grup personash, që nuk e di të kujt ishin. Kishte provokatorë të shumtë. Ishte një klimë e tensionuar, sepse qeveria kishte qëllimin vetëm të bënte zgjedhje dhe t’ia linte fajin opozitës”, tha Vasili.
