Ministrja e Arsimit, Besa Shahini ka deklaruar se duke filluar nga data 9 shtator në afro 240 shkolla të vendit do të zhvillohen “inspektime të rastësishme”. Sipas saj kjo për shkak të sigurimit se të gjithë mësuesit dhe infrastruktura në shkolla, janë aty ku duhet për të nisur me këmbë të mbarë vitin e ri shkollor.
“Duke filluar nga data 9 shtator, në afro 240 shkolla të vendit do të zhvillohen “inspektime të rastësishme” në mënyrë që të sigurohemi se të gjithë mësuesit dhe infrastruktura në shkolla janë aty ku duhet për të nisur me këmbë të mbarë vitin e ri shkollor! “, shprehet ajo.
Më tej ajo është shprehur se do të shikohet gjithçka me imtësi sa i përket procesit mësimor.
“Do shohim gjithçka nga klasat, shpërndarja e regjistrave dhe duhet të jemi gati për në 16 shtator”, ka vijuar sqarimin e saj ministrja.
Sot pati edhe denoncime nga PD-ja për tekstet shkollore. Ish-deputetja Orjola Pampuri ka denoncuar së fundmi se librat e nxënësve të shkollës janë shumë të shtrenjta për t’u blerë. Sipas saj tekstet shkollore kushtojnë sa gjysma e një rroge prindi.
