Skënderbeu është i fokusuar totalisht në merkato. Dhe, nuk duan vetëm që të forcojnë ekipin, por mbi të gjitha të mbushin arkat.
E thënë ndryshe, klubi po punon që të shesë “yjet” që i kanë mbetur në organikë. Në kushte të tilla duket se klubi ka piketuar dy futbollistët, të cilët mund të sjellin të ardhura dhe me ta vijojnë negociatat për një largim të mundshëm. Bëhet fjalë për Jorgo Pëllumbin dhe Dejvi Bregun.
SHITJET
Duke nisur nga Pëllumbi, bisedimet vijojnë me ekipin e Gentit në Belgjikë, atje ku korçarët duket se kanë pritur me shumë ëndje një ofertë të përshtatshme për lojtarin 19- vjeçar. Nëse para disa javësh oferta e Gentit ka qenë konkrete, duket se preten dimet e Skënderbeut kanë qenë të mëdha.
Bardhekuqtë kanë kërkuar një shumë që shkonte deri te 500 mijë euro dhe një përqindje të kartonit të futbollistit në fjalë, i cili, për shkak të moshës së re dhe duke parë cilësitë që ka, mund të vlejë më shumë në të ardhmen. Një strategji kjo e ndjekur edhe me rastin e Olainkës.
Por, nga ana e klubit belg nuk janë të gatshëm të paguajnë këtë shifër. Bisedimet, nga sa referohet, janë ende të hapura dhe deri në fund të merkatos gjithçka mund të ndodhë. Nga ana tjetër, një situatë gati e ngjashme paraqitet edhe për Dejvi Bregun. Vlonjati ka rënë në sy të dy ekipeve të huaja.
Istra në Kroaci kërkon të ketë shërbimet e lojtarit në fjalë, ndërsa së fundi është bërë pjesë e tratativave edhe një ekip i Superligës turke, emri i së cilit ende nuk bëhet me dije.
Të dy këto ekipe janë në bisedime me drejtuesit e merkatos së Skënderbeut për një mundësi ndërrimi ambienti për vlonjatin. Nga ana e tij, Skënderbeu është i vendosur në kërkesat që ka për “xhevahirin” e ekipit dhe kërkon të shohë se kush do të jetë oferta më e mirë.
/PANORAMASPORT.AL/
