E shtuna e zezë/ Dy të vdekur e 5 të plagosur nga aksidentet rrugore

Dy persona humbën jetën dhe 5 të tjerë kanë mbetur të plagosur si pasojë e aksidenteve rrugore gjatë të shtunës.

Një grua 47-vjeçare, këmbësore, dhe një djalë 24 vjeç që udhëtonte me motor, humbën jetën pasi u përplasën nga makinat. 47-vjeçarja u aksidentua në vendin e quajtur “Patos fshat”, ku një mjet tip “Audi” ka përplasur këmbësoren Ardiana Merja, 47 vjeçe.

Një tjetër aksident me pasojë vdekjen ka ndodhur në mesditë në autostradën Levan-Tepelenë. Ngjarja ndodhi në afërsi të fshatit Çerven, ku mësohet se një automjet tip “Mercedes” me traga FR 0790 P është përplasur me një motor me targa greke, ku ka humbur jetën drejtuesi i motorit, 24-vjeçari me inicialet F. T.

Ndërkohë në akset rrugore në Fushë-Krujë, Mamurras, Laç e Elbasan u plagosën nga aksidentet edhe 5 persona të tjerë, që fatmirësisht ndodhen jashtë rrezikut për jetën.

Tre persona kanë mbetur të plagosur në dy aksidente të ndodhura në autostradën Milot-Mamurras pasditen e djeshme. Aksidenti i parë u regjistrua pranë kryqëzimit të Patokut, ku nga përplasja e dy mjeteve mbeti i plagosur një person, i cili ishte drejtuesi i njërit prej mjeteve. Ndërkohë, pak minuta më vonë, një tjetër aksident ndodhi në afërsi të Mamurrasit, shkruan Panorama.

LEXO EDHE  Thirrja e Metës për protestë, Ndoka: S’kemi vendimmarrje si opozitë. Do marr pjesë si qytetar

Një automjet doli nga rruga dhe për pasojë u plagosën shoferi dhe pasagjeri. Sipas të dhënave të Policisë, tre të plagosurit në 2 aksidente ndodhen jashtë rrezikut për jetën, ndërsa Policia ka nisur hetimet për zbardhjen e rrethanave.

Dy persona kanë mbetur të plagosur rëndë si pasojë e një aksidenti të ndodhur në afërsi të Gjormit në Fushë-Krujë.

Ata janë dërguar me urgjencë në Spitalin e Traumës në Tiranë. Ndërsa një tjetër automjet ka dalë nga rruga pranë qendrës së qytetit të Elbasanit dhe më pas është përmbysur në kanal.

Për pasojë, kanë mbetur të lënduar lehtë dy persona.